Bu “transfer pəncərə”sində Noa Lanq və Yaser Asprilyanı heyətinə qatan “Qalatasaray” 3-cü keçidini rəsmiləşdirmək üzrədi.

"Football-plus.az" xəbər verir ki, Türkiyə çempionu “Vilyarreal”ın üzvü Pape Qeye ilə ilkin razılıq əldə edib. Bu xəbəri Türkiyənin “Sabah” nəşri paylaşıb. “Vilyarreal” danışıqlara 40 milyon avrodan başlasa da, artıq 35 milyon avroya enib.

Lanqla Asprilyanı icarəyə götürən “Cim-Bom”un büdcəsindən bu transferlərə o qədər də böyük pullar çıxmayıb. Ona görə də Okan Burukun tələb etdiyi dayaq yarımmüdafiəçi mövqeyinin gücləndirilməsinə klub 30 milyon avro xərcləməyə hazırdı. “Sarı-qırmızılar” La Liqa təmsilçisi ilə məhz bu məbləğə anlaşmaq istəyir.

İddialara görə 27 yaşlı futbolçunun özü ilə artıq bütün məsələlərdə anlaşma əldə olunub. Qeye illik 4 milyon avro maaş olmaqla 4,5 illik təklifi qəbul edib. Daha öncə “Havr”, “Marsel” və “Sevilya”da forma geymiş Qeye yaxınlarda başa çatan Afrika Millətlər Kubokuna damğa vuran isimlərdən biri olmuşdu. Turnirin rəmzi “11-liy”inə seçilən bu futbolçu Mərakeşə qarşı finalın əlavə vaxtında fərqlənməklə qəhrəmana çevrilmiş və Seneqala tarixinin ikinci çempionluğunu qazandırmışdı.

Bu arada “Qalatasaray” rəhbərliyinin Lukas Torreyra ilə bağlı yeni planı bəlli olub. Son vaxtlar bu təcrübəli futbolçu ilə bağlı bir çox iddia dolaşır. Uruqvaylı futbolçunun meneceri verdiyi açıqlamada onun artıq Türkiyədə əvvəlki kimi istəkli oynamadığını və ailəsinə daha yaxın olmaq istədiyini dilə gətirmişdi. Torreyra isə bu sözlərə aydınlıq gətirərkən ayrılmaq niyyətində olmadığını vurğulasa da, atasının səhhətindəki problemləri qabartmağı unutmamışdı.

Bu hadisələrin fonunda 28 yaşlı futbolçunun ÇL-də “Mançester Siti”yə qarşı önəmli səfər matçında start heyətində olmaması diqqəti çəkdi. Baş məşqçi Okan Buruk oyunöncəsi açıqlamasında uruqvaylının ağrılarının olduğunu dilə gətirdi.

Türkiyə mətbuatının yazdığına inansaq, Torreyranın “ağrılarının” əsl səbəbi onun daha çox pul qazanmaq istəyidi. Yunus Akgün və Davinson Sançesin müqaviləsinin yenilənməsinin ardından Torreyra rəhbərliyin ona münasibətdə də eyni addımı atmasını istəyir. Belə görünür, rəhbərlik onun bu arzusunu yerinə yetirmək niyyətindədi. 2022-də Türkiyəyə gələrkən illik 2,7 milyon avro qazanan, 2024-də maaşı 3,5 milyon avroya yüksəldilən Torreyranın bu dəfə qazancı 4 milyon avroya qaldırılacaq.

Bu mövsüm 28 oyuna çıxan ulduz futbolçunun “Qalatasaray”la 2028-ci ilə qədər müqaviləsi var.