''Qalatasaray''ın heyətində sərgilədiyi mükəmməl performansla bir il ərzində Türkiyə futbolunda böyük iz buraxan Viktor Osimhenlə bağlı yeni xəbərlər var.

Nigeriyalı ulduzun Səudiyyə Ərəbistanı təmsilçisi ''Əl-Hilal'' ilə ilkin anlaşma əldə etdiyini xəbər vermişdik.

Bu arada Osimhenin Türkiyədən ayrılmadan öncə ''Qalatasaray''ın onu transfer etmək üçün daha bir dəfə cəhd etdiyi məlum olub. 26 yaşlı futbolçu bazar günü axşam saatlarında ''Qalatasaray''ın prezidenti Dursun Özbəkə məxsus ''Point Otel''də klub rəsmiləri ilə görüş keçirib. Orda ''Qalatasaray'' ünlü futbolçuya sonuncu və yenilənmiş təklifini irəli sürüb. Dursun Özbək Osimhenə bonuslardan əlavə illik 15 milyon avro maaş olmaqla dördillik müqavilə təklif edib.

Türkiyə mətbuatının iddiasına görə qoleador ''sarı-qırmızılar''dan illik 20 milyon avro tələb edib. Yəni dörd il ərzində Osimhen 80 milyon avro qazanmaq istəyirsə, ''Qalatasaray'' 60 milyon avro maaş təklif edir. Ancaq Avropa və Səudiyyə Ərəbistanı mətbuatının iddiasına görə Osimhen artıq ''Əl-Hilal''ın üzvüdü. Hətta onun yeni klubunda debüt oyunu da bəllidi.

İyunun 18-də bu komanda Klublararası Dünya Çempionatında qrupun ilk oyununda ''Real'' ilə qarşılaşacaq. İddialara görə Osimhen yeni klubunda məhz həmin matçda debüt edəcək. Amma maraqlıdı ki, daha öncə ''Əl-Hilal''ın Osimhenə illik 40 milyon avro maaş ödəyəcəyi bildirilirdisə, son xəbərlərdə bu məbləğ 30 milyon avro göstərilir.

Tərəflərin üçillik müqavilə imzalayacağını nəzərə alsaq, Osimhen Səudiyyə Ərəbistanında ən azı 90 milyon avro qazanacaq!