Qış transfer dönəminə sürətli başlayan “Fənərbaxça” Entoni Musabanın ardından ikinci transferini reallaşdırıb.

"Football-plus.az" xəbər verir ki, İstanbul nəhəngi Matteo Genduzinin keçidini bitirib.

Tanınmış fransalı yarımmüdafiəçi son detalları razılaşdırmaq və tibbi müyinədən keçmək üçün İstanbula gəlib. Özü də ailəsi ilə birlikdə. Klubdan hələ ki rəsmi açıqlama gəlməsə də, Türkiyə mətbuatında müqavilənin detallarına dair xəbərlər paylaşılıb. İdialara inansaq, bu transfer bonuslarla bilrikdə “Fənər”ə 30 milyon avroya başa gələcək. Bu, klub tarixinin yeni rekordudu! Əvvəlki rekord 25 milyon avroya transfer olunan Kərəm Aktürkoğluya məxsus idi. Genduzi ilə “4,5+1” illik müqavilə imzalanacaq. Əsasən dayaq yarımmüdafiəçisi kimi oynayan, amma hücuma dəstək verməyi də bacaran Genduzi “Loryan”ın yetirməsidi. Onun ulduzu 2018-ci ildə transfer olunduğu “Arsenal”da parlayıb. Hətta 2018/19-da AL-in qrup mərhələsində “Qarabağ”a qol vurmağı da bacarıb. “Herta” və “Marsel”də də top qovmuş istedadlı futbolçu 2023-dən bəri “Latsio”nun şərəfini qoruyurdu. Genduzi bu mövsüm romalıların heyətində 16 rəsmi oyuna çıxaraq hesabına 2 qol, 1 məhsuldar ötürmə yazıb.

“Fənərbaxça” ilə bağlı daha iki transfer xəbərini diqqətinizə çatdıraq. “Sarı-lacivərdlilər” “Beşiktaş”a lazım olmayan Mərt Günoku 10 ildən sonra geri qaytarıb. Türkiyə mətbuatının yazdığına inansaq, artıq tibbi müayinədən keçən təcrübəli qapıçı ilə 2,5 illik müqavilə imzalanıb.

Xatırladaq ki, 25 yaşlı qapıçı “Fənər”in öz yetirməsidi. O, klubu 10 il öncə tərk etmiş və daha sonra 2 il “Bursaspor”un, 4 il “İstanbul BŞ”nin və 4 il “Beşiktaş”ın şərəfini qorumuşdu. İndiyə qədər Türkiyə yığmasında 37 oyun keçirən Günok dünən köhnə-yeni klubunda ilk məşqə çıxıb. Domeniko Tedeskoya lazım olmayan və noyabrın əvvəllərindən “Fənər”də əsas heyətdən kənarlaşdırılan İrfan Can Kahvecinin də yeni klubunun adına aydınlıq gəlib. Təcrübəli futbolçu mövsümün sonuna qədər icarə əsasında “Kasımpaşa”nın şərəfini qoruyacaq. Əmrə Belözoğlunun çalışdırdığı “Kasımpaşa” “Fənər”in daha bir üzvünü – Rodriqo Bekaonu da heyətinə qatmaq istəyir. Danışıqlar davam edir.