Bu transfer dönəmini o qədər də fəal keçirməyən ''Beşiktaş'' heyətini yeni futbolçu ilə gücləndirib.

İstanbul nəhəngi həm Uilfrid Ndidi həm də klubu ''Lester'' ilə anlaşma əldə edib. 28 yaşlı yarımmüdafiəçi bu gün səhər saatlarında İstanbula gəlib. Nigeriyalı futbolçu tibbi müayinədən keçdikdən sonra rəsmi müqaviləyə imza atacaq.

Əslində bu transfer daha öncə tamamlana bilərdi. Sadəcə bu futbolçuya son anda ''Betis'' ciddi maraq göstərməyə başladı. Amma ispanların təklifi ''Lester'' rəhbərliyini qane etmədi. Türkiyə mətbuatının yazdığına inansaq, bu transfer ''ağ-qaralar''a 9,5 milyon avroya başa gələcək və Ndidi ilə dördillik müqavilə imzalanacaq. Onun illik qazancı 4 milyon avroya yaxın olacaq.

Nigeriya yığmasının üzvü olan Ndidi əsasən dayaq yarımmüdafiəçisi kimi oynayır. Onun peşəkar karyerası 2015-ci ildə ''Genk''də başlayıb. 2017-dən bu yana isə Ndidi ''Lester''in şərəfini qoruyurdu. Bu futbolçu ötən mövsüm 30 rəsmi oyunda iştirak edərək aktivinə 1 qol, 5 məhsuldar ötürmə yazıb.

Ndidi bu yay ''qartal''ın Temmi Abraham, Orkun Kökçü və David Yurasekdən sonra 4-cü transferidi.