Kərəm Aktürkoğlunu 22,5 milyon avroya almaqla tarixinin ən bahalı transferini reallaşdıran, eləcə də tanınmış braziliyalı qapıçı Ederson və ispaniyalı ulduz Marko Asensionu heyətinə qatan ''Fənərbaxça'' həm də bu günlərdə çox mühüm bir satış reallaşdırıb.

Belə ki, klubun öz yetirməsi olan Yusuf Akçiçək 22 milyon avro qarşılığında Səudiyyə Ərəbistanı təmsilçisi ''Əl-Hilal''a transfer olunub. Yayboyu adı bir çox Avropa klubu ilə yanaşı hallanan 19 yaşlı mərkəz müdafiəçisi göründüyü kimi sonda Səudiyyə Ərəbistanı nəhənginə qismət oldu.

Yusuf Joze Mourinyonun ''Fənərbaxça''ya verdiyi nadir faydalardan biridi. Məhz portuqaliyalı mütəxəssis ötən mövsümün gedişində çəkinmədən gənc və təcrübəsiz müdafiəçiyə şans verərək onun ulduzunu parlatdı.

Türkiyə yığmasına da dəvət almağa başlayan Akçiçək ötən mövsüm 21 rəsmi oyunda forma geyərək aktivinə 2 qol, 1 məhsuldar ötürmə yazdı.

Son illərə nəzər salsaq, ''Fənər''in bəzi gənc futbolçuları parladaraq baha qiymətə satdığının şahidi oluruq. Məsələn, 2017-ci ildə ''Rabotniçki''dən cəmi 180 min avroya alınan Elif Elmas iki il sonra 17,7 milyon avroya ''Napoli''yə satıldı. 2018-də 4,4 milyon avroya transfer edilən Fərdi Kadıoğlu yeni səviyyəyə çatdıqdan sonra ötən yay 30 milyon avro qarşılığında ''Brayton''a yollandı. ''Fənər''in əvvəlcə pulsuz akademiyaya cəlb etdiyi, sonra əsas komandada şans verərək ulduzunu parlatdığı Arda Gülər isə 10 milyon avrosu bonuslarla olmaqla 2023-cü ildə 30 milyon avroya ''Real''a yollandı.

Yəni ''Fənər'' son 7 ildə 4 gənc futbolçunun satışından 100 milyon avroya yaxın məbləğ qazanıb.