Kərəm Aktürkoğlunun transferini bitirməyə çalışan ''Fənərbaxça'' paralel olaraq başqa transferləri də həyata keçirir.

İstanbul nəhəngi son günlərdə danışıqlar apardığı ''Zaltsburq''lu Nene Dorgelesi dünən gecə saatlarında Türkiyəyə dəvət edib. Malili futbolçu son detalları razılaşdırmaq və tibbi müayinədən keçmək üçün ''sarı-lacivərdlilər''in idman direktoru Devin Özək ilə birlikdə İstanbula gəlib. Bu transferin ''Fənər''ə 5 milyon avrosu bonuslarla olmaqla 20 milyon avroya başa gələcəyi gözlənilir.

22 yaşlı vinger hər iki cinahda oynamağı bacarır. Futbola vətənində başlayan Nene ''Zaltsburq'' skautları tərəfindən kəşf edilərək 2021-ci ildə bu kluba dəvət olunub. İlk mövsümləri ''Liferinq'', ''Rid'' və ''Vesterlo''da icarədə keçirən istedadlı futbolçu 2023-cü ildən ''Zaltsburq''un şərəfini qoruyurdu.

Transfer dəyəri 12 milyon avro olan və 174 sm boya malik olan Nene geridə qoyduğumuz mövsümdə 49 rəsmi oyunda iştirak edərək aktivinə 15 qol, 9 məhsuldar ötürmə yazıb. Mali yığmasında isə o, 24 oyuna 7 qol vurub. Bundan başqa ''Fənər'' ''Vest Hem''li Edson Alvaresin də keçidini tamamlamağa yaxındı. Fabritsio Romanonun xəbərinə görə London klubu ilə artıq anlaşma əldə olunub. Bu transfer icarə əsasında baş tutacaq. İstanbul nəhəngi həm müəyyən miqdar icarə haqqı ödəyəcək, həm də Alvaresə ''Vest Hem''də qazandığı qədər maaş verəcək. Daha öncə ''Ayaks''da forma geymiş və transfer dəyəri 25 milyon avro olan 27 yaşlı meksikalı dayaq yarımmüdafiəçisi ötən mövsüm 31 rəsmi oyuna çıxaraq 1 qol vurub.

Türkiyə futbol ictimaiyyətinin diqqət mərkəzində saxladığı Kərəm Aktürkoğlunun başıbəlalı transferi isə belə görünür, tamamlanmaq üzrədi. Bir ara keçid düyünə düşsə də, ''Benfika'' ''Fənər''in ''22,5+2,5'' milyon avroluq son təklifini qəbul edib. Bu məbləğ qarşı tərəfə hissə-hissə ödəniləcək. Kərəm ÇL-in pley-off matçı üçün bu gün Lissabon nəhənginin heyətində İstanbula gələcək. Onun artıq İstanbulda qalacağı və ən qısa müddətdə rəsmi müqaviləyə imza atacağı gözlənilir.