Türkiyə çempionatında ilk dövrəyə ötən həftə keçirilən 17-ci turla yekun vuruldu. 17 tur ərzində 153 qarşılaşma baş tutub.

"Football-plus.az" xəbər verir ki, ilk dövrənin yekunlarına aid ən maraqlı məqam yerli və əcnəbi futbolçuların sayı ilə bağlıdı. Belə ki, elitada çıxış edən 18 komanda ümumilikdə 475 futbolçunun xidmətindən istifadə edib. Ən çox futbolçudan istifadə edən klub “Fənərbaxça”dı. İstanbul nəhəngi 32 fərqli futbolçuya şans verib. İstanbulun digər nəhəngi “Beşiktaş” (30) bu göstəricidə ikinci pillədə qərarlaşıb. Ən az (21) futbolçu oynadan klub isə “Kasımpaşa”dı.

Maraqlıdı ki, ilk dövrə ərzində oynamaq şansı qazanmış 475 futbolçudan 210-u yerli, 265-i isə əcnəbidi. Yəni qardaş ölkənin çempionatında əcnəbi futbolçuların sayı yerlilərdən çoxdu! İlk dövrədə legionerlərin xidmətindən ən çox yararlanan klub “Gənclərbirliyi”di. Debütant olan paytaxt təmsilçisi 18 legionerin xidmətindən yararlanıb. “Fənərbaxça”, “Trabzonspor” və “Kocaelispor” isə hərəyə 17 legioner oynadıb.

Digər tərəfdən, “Beşiktaş” yerlilərə güvənməsi ilə diqqəti çəkir. “Qartal” ilk dövrədə hamıdan çox – 16 yerli futbolçunun xidmətindən istifadə edib. Onu da bildirək ki, ilk dövrədə superliqada forma geyən 265 legioner 68 fərqli ölkəni təmsil edir. Türkiyə çempionatında ən çox futbolçu ilə təmsil olunan ölkələr Braziliya (25), Portuqalya (16), Nigeriya (11) və Seneqaldı (10).

Məşqçi istefalarına gəlincə, 18 klubdan yalnız altısı yoluna mövsümün əvvəlindəki məşqçi ilə davam edir. Söhbət “Qalatasaray”, “Trabzonspor”, “Kocaelispor”, “Samsunspor”, “Alanyaspor” və “Göztəpə”dən gedir. Digər 12 klubda isə məşqçi dəyişib. “Antalyaspor” və “Gənclərbirliyi” hətta iki dəfə məşqçi dəyişikliyinə getdiyindən bu mövsüm indiyə qədər ümumilikdə 14 istefa baş tutub.