Artıq sabah ''Qalatasaray'' - ''Hatayspor'' oyunu ilə Türkiyə çempionatında sayca 67-ci mövsüm start götürəcək.

Bunu nəzərə alaraq sizi Türkiyə çempionatının tarixi ilə bağlı bəzi maraqlı göstəricilərlə tanış edirik. Öncə qeyd edək ki, 1959-cu ildən keçirilən bu turnirdə indiyə qədər 75 fərqli komanda çıxış edib.

''Eyüpspor'' ilə ''Bodrum'' bilindiyi kimi tarixində ilk dəfə elitada oynamağa haqq qazanıb. Onların gəlişi ilə superliqada çıxış edən kollektivlərin sayı 77-yə yüksəlib. ''Qalatasaray'' 24 çempionluqla hamını üstələyirsə, ''Fənərbaxça'' 19 çempionluqla ikinci pillədədi. Amma buna baxmayaraq geridə qalan 66 mövsüm ərzində demək olar, bütün önəmli statistik göstəricilərdə ''Fənərbaxça'' liderdi. Türkiyə çempionatı tarixində həm ən çox xal toplayan, həm ən çox qələbə qazanan, həm də ən çox qol vuran komanda məhz ''Fənər''di! ''Sarı-lacivərdlilər'' 2196 oyuna 3880 xal toplayıblar. Bu, ikinci pillədəki ''Qalatasaray''ın göstəricisindən (3842) 38 xal çoxdu.

3-cü pillədə ''Beşiktaş'' (3710), 4-cü pillədə ''Trabzonspor'' (2788) qərarlaşıb. ''Fənərbaxça'' 1262 qələbə ilə burda da hər kəsi üstələyir. ''Qalatasaray'' (1254) yalnız 8 qələbə geri qalır. ''Beşiktaş'' (1186) və ''Trabzonspor'' (843) yenə uyğun olaraq 3 və 4-cü pillələrdə qərarlaşıb. Qol sayında isə ''Fənərbaxça'' (3944) ''Qalatasaray''dan (3898) 46 top öndədi. ''Cim-Bom''un öyünə biləcəyi əsas göstərici liderlik sayıdı. Komanda ümumilikdə 602 turu zirvədə tamamlayıb və bu göstəricidə hamıdan öndədi. ''Fənərbaxça'& 588 tur, ''Beşiktaş'' 437 tur, ''Trabzonspor'' isə 240 tur lider olub.

Maraqlıdı ki, İstanbul nəhənglərindən sonra superliqada ən çox mövsüm keçirən komanda ''Ankaragücü''dü. İstanbul nəhəngləri geridə qalan 66 mövsümün hər birində elitada yer alıblar. Hazırda 1-ci liqada çıxış edən ''Ankaragücü'' elitada ümumilikdə 54 mövsüm keçirib. Düzdü, ''Trabzonspor'' da heç vaxt elitanı tərk etməyib. Amma komanda elitaya ilk dəfə 1974-də yüksəlib. Yəni Trabzon təmsilçisi superliqada yalnız 51-ci mövsümünə qədəm qoyur.

ƏLİ