Türkiyə futbolu uzun illərdi hakimliklə bağlı mübahisələrin kölgəsində varlığını davam etdirir. Türkiyə çempionatında tez-tez hakimlikdən şikayətlər olur.

"Football-plus.az" xəbər verir ki, qardaş ölkə əcnəbi VAR hakimlərinin xidmətindən istifadə etməyə başlayandan sonra şikayətlər nisbətən azalıb.

TFF hələ 2023/24 mövsümünün sonlarından etibarən ilk dəfə bu praktikadan istifadə etməyə başlamışdı. Ötən yay federasiyada prezident dəyişikliyi baş verəndən sonra 2024/25-in ilk dövrəsində yalnız yerli hakimlərlə yola davam edildi. Amma vəziyyət çıxılmaz həddə çatdığından yanvardan etibarən yenidən ölkəyə əcnəbi hakimlər dəvət olunmağa başlandı. Əcnəbi VAR hakimlərinin dəvət edilməsindən sonra şikayətlər əhəmiyyətli dərəcədə azaldı. Federasiya ötən mövsüm hətta “Qalatasaray” – “Fənərbaxça” matçında əsas hakimi də xaricdən dəvət etməli olmuşdu. Amma bu praktikadan yalnız bir dəfə istifadə olundu. Bu arada artıq təqvimi bəlli olan 2025/26 mövsümü üçün də federasiya əcnəbi VAR hakimi mövzusunda yekun qərarını verib.

Məlum olub ki, TFF bu praktikadan daha bir il yararlanmaq qərarına gəlib. Yəni qarşıdakı mövsümdə də elita matçlarında VAR-da əcnəbilər əyləşəcək. Bundan başqa, belə qərara alınıb ki, Hakimlər Komitəsi yerli VAR hakimləri üçün xüsusi hazırlıq və təlimlər keçəcək. Bu plan özünü doğrultsa, 2026/27 mövsümündən etibarən artıq VAR-da əcnəbi yox, yalnız yerli hakimlərin xidmətindən istifadə olunacaq.