''Fənərbaxça'' camiəsi yeni ili sürpriz bir xəbərlə qarşılayıb.

"Football-plus.az" xəbər verir ki, Türkiyə mətbuatında başqan Sadəttin Saranın növbədənkənar seçkilərə gedəcəyi ilə bağlı yayılan şayiələr öz təsdiqini tapıb.

Dekabrın 31-də Saran klubun idarə heyətinin toplantısının ardından geniş açıqlama verərək mövsüm bitdikdən sonra növbədənkənar seçkilərin keçiriləcəyini açıqlayıb. Dəqiq tarix daha sonra bəlli olacaq.

Məlum olduğu kimi bir müddət öncə Saranın adı mətbuatın və futbol ictimaiyyətinin gündəmini zəbt etmişdi. O, narkotik maddələrin istifadəsi və dövriyyəsi ilə bağlı aparılan əməliyyat zamanı iki dəfə saxlanılaraq ifadə verməli olmuşdu. Hətta onun saçından götürülən nümunədə kokain aşkarlanmışdı. Saran bununla razılaşmayaraq heç vaxt kokaindən istifadə etmədiyini bildirmiş və müstəqil tibb mərkəzlərindən birində yenidən analizlər vermişdi. Bundan başqa onun aparıcı Ela Rumeysa Cebeci ilə qalmaqallı intim ''vatsapp'' yazışmaları üzə çıxmışdı.

Məhz bütün bu olaylardan sonra Saran Əli Koç başda olmaqla camiənin öndə gələn isimlərinin növbədənkənar seçkilərlə bağlı təklifinin üzərində düşünərək razılaşıb. Əli Koçun namizəd olacağı gözlənilmir. Koç Sarana dəstək verdiyini açıqlayıb. Hələlik Sarandan başqa kimin namizəd olacağı barədə məlumat yoxdu.

Xatırladaq ki, Saran özü də növbədənkənar seçkilərdə qalib gəlməklə prezident seçilib. O, sentyabrın 21-də qələbə qazanmaqla Əli Koçun 7 illik dönəminə son qoymuşdu.