''Trabzonspor''un ciddi maraq dairəsində olan ''Fənərbaxça''nın vingeri Oğuz Aydına bu dəfə ölkə xaricindən təklif gəlib.

"Football-plus.az" xəbər verir ki, Yağız Sabuncuoğlunun paylaşdığı məlumata görə Rusiya təmsilçisi ÇSKA bu futbolçunu icarəyə götürmək istəyir. Moskva klubu müqaviləyə 5,5 milyon avroluq məcburi transfer maddəsi də saldırmaq istəyir. Yəni ''hərbçilər'' mövsümün sonunda bu məbləği ödəyərək Oğuzu birdəfəlik transfer etməyə razıdılar.

25 yaşlı futbolçu ''Fənər''ə 2024-ün yayında 6 milyon avroya ''Alanyaspor''dan transfer olunub. Türkiyə yığmasına da tez-tez dəvət alan Oğuz Aydın İstanbul nəhəngində oyun praktikasının azlığından əziyyət çəkməsə də, onu əsas heyət üzvü adlandırmaq olmaz. Şayiələrə inansaq, Aydın ''Trabzonspor''dan təklif aldıqdan sonra qarşı tərəfə ''ailəmlə düşünüb qərar verəcəm'' demişdi. Amma fanatların sərt etirazından sonra ''sarı-lacivərdlilər'' bu oyunçunu Trabzona göndərməkdən imtina edib.

İki klub arasında münasibətlərin qaydasında olmaması heç kimə sirr deyil. Amma əsas səbəb odu ki, yayda Uğurcan Çakırın ''Fənərbaxça''ya transferi gündəmə gələrkən ''Trabzonspor''un prezidenti Ərtuğrul Doğan ''özünə əl qatmışdı''. O, kapitanı heç bir halda ''Fənərbaxça''ya satmayacaqlarını bildirmişdi.

Bu açıqlamasından bir qədər sonra isə Uğurcan bilindiyi kimi ''Qalatasaray''a transfer olundu. Ona görə də indi ''Fənər'' fanatları birmənalı şəkildə Oğuz Aydının ''Trabzonspor''a satılmasını istəmir.