''Atletik''lə qarşılaşmada yol verdiyi kobud səhvdən sonra gözdən düşən ''Fənərbaxça''nın mərkəz müdafiəçisi Samet Akaydının gələcəyi ilə bağlı bir çox şayiələr dolaşır.

Son günlərə qədər ona ən ciddi maraq göstərən klub ''Trabzonspor'' idi. Amma bu futbolçu uğrunda mübarizəyə daha iki klub qoşulub. Bu, A seriyası təmsilçisi ''Venetsiya'' və Fatih Terimin yenicə başına keçdiyi Səudiyyə Ərəbistanı təmsilçisi ''Əl-Şabab''dı.

Terimin yenidən Sameti öz komandasında görmək istəməsi sürpriz deyil. ''İmperator'' ötən mövsümün gedişində ''Panatinaikos''un başına keçdikdən sonra da Akaydını Yunanıstan nəhənginə transfer etmişdi. Yeri gəlmişkən, ''Əl-Şabab'' tək Sametə yox, ''Fənərbaxça''da əsas heyətə düşməkdə çətinlik çəkən digər futbolçu - Cengiz Ündərə də də ciddi maraq göstərir. ''Venetsiya'' 30 yaşlı Sameti mövsümün sonuna qədər icarəyə götürmək, ''Trabzonspor'' isə daimi əsasda heyətinə qatmaq istəyir.

Türkiyə yığmasının üzvü olan Samet dekabrın 11-də Avropa Liqasının əsas mərhələsində ''Atletik''lə ev oyununda (0:2) kobud səhvə yol vermiş, fanatların böyük etirazı ilə üzləşmiş və fasilədə əvəzlənmişdi. Joze Mourinyo bu oyunçunu qorumağa çalışacağını və ev oyunlarında onu oynatmayacağını bildirmişdi. Samet həmin qarşılaşmanın ardından keçirilən hər iki oyunun iştirak ərizəsinə salınmadı.

Bu mövsüm 7 oyuna çıxaraq 1 qol vuran və ''Fənər''lə 2026-nın yayına qədər müqaviləsi olan Akaydın ''Trabzonspor''a transfer olunacağı təqdirdə Türkiyə futbolunda 2017-dən bu yana bir ilk yaşanacaq. Bilindiyi kimi ''Fənərbaxça'' ilə ''Trabzonspor''un münasibətləri uzun illərdi, gərgindi və bu iki klub çox nadir hallarda bir-birindən oyunçu alır.

''Fənər''dən birbaşa Trabzona yollanan sonuncu futbolçu 2017-nin yayında Volkan Şən olub.

ƏLİ