''Fənərbaxça'' hələ də bu yayın ilk transferini rəsmiləşdirməyib. Amma İstanbul nəhəngi önəmli isimlərə təklif irəli sürməkdə davam edir.

"Football-plus.az" xəbər verir ki, ''Fənər'' son dönəmlərdə diqqət mərkəzində saxladığı ''Əl-Nəssr''in forvardı Con Duran ilə bağlı real addımlar atmağa başlayıb.

Komanda kolumbiyalı forvardı birillik icarəyə götürmək və birillik maaşını qarşılamaq istəyir. Bunun üçün Səudiyyə Ərəbistanı nəhənginə 16 milyon avro təklif olunub. Bu xəbəri Türkiyənin ''Haber Qlobal'' kanalı paylaşıb. ''Sarı-lacivərdlilər'' futbolçudan cavab gözləyirlər.

Qeyd edək ki, ''Aston Villa''da özünü yaxşı tərəfdən göstərməyi bacaran 21 yaşlı hücumçu ötən mövsümün qış transfer dönəmində 77 milyon avroya Kriştiano Ronaldonun yanına, yəni ''Əl-Nəssr''ə yollandı. O indiyə qədər bu klubda 18 oyuna çıxaraq 12 qol vurub.

Bundan başqa ''Fənər'' Səudiyyə Ərəbistanında çıxış edən daha bir önəmli futbolçunu - ''Əl-Əhli''nin üzvü Vanderson Qalenonu da icarəyə götürmək istəyir. Uzun illər ''Portu''da çıxış edən 27 yaşlı braziliyalı futbolçu ötən mövsümü qış transfer dönəmində 50 milyon avro qarşılığında Səudiyyə Ərəbistanına yollandı. Amma iddialara görə ''sambaçı'' bu ölkəyə uyğunlaşa bilmədiyi üçün Avropaya qayıtmaq istəyir. ''Əl-Əhli'' astronomik məbləğ ödədiyi futbolçunu icarə əsasında buraxmaq istəməsə də, ''Fənər'' ilə bu klub arasında danışıqlar davam edir. Bu futbolçu ilə aparılan danışıqlar prosesində başqan Əli Koç özü də iştirak edir.

Qaleno geridə qoyduğumuz mövsümdə ''Portu'' və ''Əl-Əhli''də ümumilikdə 49 rəsmi oyuna çıxaraq aktivinə 19 qol, 8 məhsuldar ötürmə yazıb. PSV-də çıxış edən belçikalı Yohan Bakayoko, ''Lill''in kanadalı üzvü Conatan David, eləcə də ''Real''dan ayrılması gündəmdə olan Lukas Vaskes ''Fənər''in maraq dairəsində olan digər futbolçulardı.