''Valensiya''nın forvardı Maksi Qomesin Türkiyəyə gəlişi ilə bağlı maraqlı olaylar yaşanmaqdadı.
''Fənərbaxça'' bu transferi bitirməyə çox yaxın görünürdü. İstanbul nəhəngi həm 26 yaşlı futbolçunun özü, həm də klubu ilə ilkin razılıq əldə etmişdi. Amma ''Fənər'' son anda transferin şərtləri ilə bağlı fikrini dəyişdirdi.
Belə ki, ''sarı-lacivərdlilər'' Qomesi daimi əsasda transfer etmək fikrindən daşınaraq onu yalnız icarəyə götürmək istədilər. Bu isə futbolçunu qane etmədi. Çünki Qomes icarəyə yollanmaq istəmirdi. O, özünə daimi klub axtarırdı. Danışıqlar prosesinin ləngiməsindən sonra Qomesin meneceri onun xidmətini başqa Türkiyə klublarına da təklif etdi. Korneliusu 6 milyon avroya ''Kopenhagen''ə satan və təcili olaraq hücumçu axtarışına çıxan ''Trabzonspor'' dərhal diqqətini bu oyunçuya yönəltdi. İspaniyanın AS nəşrinin yazdığına inansaq, ''yarasalar'' 6 milyon avro, Qomes özü isə 2,5 milyon avro məvacib və üçillik müqavilə tələb etdi. ''Trabzonspor'' bu şərtlərin hamısı ilə razılaşdı! Bu keçid demək olar, artıq tamamlanıb. Qomesin bu gün Trabzona gələcəyi gözlənilir.
Qeyd edək ki, bu oyunçunun ulduzu 2017-də transfer olunduğu ''Selta''da parlayıb. 2019-da ''Valensiya'' Qomes üçün 14,5 milyon avro ödəmişdi. Ümumilikdə forvard karyerası ərzində oynadığı 235 rəsmi oyunda 82 qol, 34 məhsuldar ötürmə ilə yadda qalıb.