Azərbaycanlı futbolçunun 5 manatını kəsdinsə, iraq-iraq, elə bil ki, canını aldın. Bu yazılmamış qanun ayda 20 min manat maaş alan üçün də keçərlidi, 2 min manat alan üçün də! Futbolumuzun tarixinə boylanıb çoxlu belə misal çəkə bilərəm. Amma ən yeni nümunənin üzərində dayanacam.

Nurlan Novruzov ad-soyadlı futbolçu var. Azərbaycan standartlarına görə normal oynayıb, 2014/15 mövsümünün bombardiri olub, 4-5 ölkədə legioner həyatı yaşayıb. Əslində indi də yaşı çox deyil, “vikipediya”sı düzdüsə, gələn ilin martında 33 yaşını tamamlayacaq. Deyəsən, çox tez veteran statusu ilə barışıb, hazırda 2-ci liqada mübarizə aparan, maliyyə problemi yaşayan “Şəki”də çıxış edir. Hə, həmin bu Nurlan bəy dekabrın 16-da, yəni “Şəki” “Qaradağ Lökbatan”la oyuna çıxmadığı günün ertəsi qol.az saytına müsahibə verib, “Şəki”yə rəhbərlik edənləri, bu klubun arxasında dayananları yıxıb-sürüyüb, amma mən kiçik sitatla kifayətlənirəm: “Komanda növbəti oyuna da çıxmayacaq. Necə çıxaq? Dörd aydır ki, komanda maaş almır. Bu klubdan elə şeylər danışaram ki... Hansı ki, bir neçə il əvvəl olurdu belə şeylər. Klub rəhbərliyi futbolçularla bir müqavilə bağlayır, PFL-lə başqa”.

Nurlan bir növ xarakiri edib, məntiqlə adam sözünün arxasında durmalı, bir daha nəinki “Şəki”yə, heç Şəkiyə də tərəf baxmamalıydı. Amma nə olub? Dekabrın 22-də keçirilən “Xankəndi” ilə oyundan əvvəl “Şəki” rəhbərliyi hardansa pul tapıb, Nurlan qarışıq bütün futbolçuların ikiaylıq maaşını ödəyib, yəni Novruzova olan 8 min manat borcun 4 minini qapayıb. Təbii ki, futbolçu qardaşımız da yaşıl meydana çıxıb, 90 dəqiqə oynayıb. İndi komandası uduzub-uduzmayıb (1:2 olub), bunun məsələyə bir o qədər dəxli yoxdu. Dediyim odu ki, bu pul zəhrimar nə gücə malikdisə, imkanlı futbolçunun da ağlını aparır, imkansızın da. Ona görə də Vəli Qasımovdan sonra heç bir azərbaycanlı futbolçu “böyük beşliy”in qapısında da görünməyib. Özbəyi var, belaruslusu var, ermənisi var, gürcüsü var, bizimki isə yoxdu. Çünki pul olmayanda söyür, pul olanda isə tullana-tullana meydana çıxır, bir gün əvvəl lənətlədiyi klub rəhbəri artıq onun gözündə mələyə çevrilir. Hey gidi dünya, hey... Vay gidi dünya, vay...

ORXAN