Eldəniz Yusubov: “Belə nəticələr klub rəhbərliyini son dərəcə narazı salıb”
Misli premyer-liqasında hədəflərinə uyğun olmayan çıxışla yadda qalan “Araz-Naxçıvan” Bizon ölkə kubokunda da uğursuzluğa düçar oldu: elitada autsayderlər qrupunda qərarlaşan “Kəpəz”i qəbul edən “qırmızı-ağlar” şok məğlubiyyətlə üzləşdi. Elmar Baxşıyevin komandası bununla mübarizəni dayandırdı və avrokuboklara aparan qısa yoldan çəkildi.
Təbii ki, naxçıvanlıların problemi bununla bitmir. “Qırmızı-ağlar” turnir cədvəlinin 6-cı pilləsində qərarlaşıb. Onlar son 9 oyunun yalnız ikisində meydanı qələbəylə tərk edib. İş ondadı ki, həmin qələbələr “İmişli” və “Karvan-Yevlax” kimi premyer-liqaya bu mövsüm yüksələn, əsas hədəfi elitada qalmaq olan komandalar üzərində qazanılıb. Bu səbəbdən “Araz-Naxçıvan”ın avrokuboklara vəsiqə qazanmaq şansının böyük olmadığını demək mümkündü.
Hər halda, çatışmazlıqlar özünü təkcə nəticədə yox, həm də kollektivin zəif və istəksiz çıxışında göstərir. Hələ onu demirik ki, “qırmızı-ağlar” “Kəpəz”dən əvvəl premyer-liqada qalmaq uğrunda çarpışan “Qəbələ”yə də uduzub.
Kəsəsi, hazırda baş məşqçi Elmar Baxşıyevin başı üzərində qara buludlar dolaşır. Artıq nəinki onun tezliklə istefaya göndəriləcəyi haqda xəbərlər yayılıb, boş qalacaq post üçün bir neçə namizədin olduğu barədə iddialar ortaya atılıb. Odu ki, düşərgədəki son durumla bağlı ətraflı məlumata ehtiyac duyduq.
Bu səbəbdən "Araz-Naxçıvan”ın icraçı direktoru Eldəniz Yusubovla əlaqə saxladıq. Klub rəsmisinə konkret suallarla müraciət etdik: “Kəpəz”ə məğlub olmaqla kubok uğrunda mübarizədən qopmağı uğursuzluq sayırsızmı? Elmar Baxşıyevin komandadakı gələcəyi həqiqətən sual altındadı? Komandanın oyununda son vaxtlar eniş olduğu haqda fikirlə razısızmı?
Eldəniz bəyi dinləyək:
“Təbii ki, “Kəpəz”lə oyunun nəticəsi bizi razı salmadı. Ciddi uğursuzluqdu. Misli premyer-liqasının 10-cu turunda “Sumqayıt”a səfərdə uduzduğumuz (2:3 – red.) oyundan sonra komandanın oyununda eniş olduğunu görürük. Belə nəticələr klub rəhbərliyini son dərəcə narazı salıb. Bu barədə fikirlər həm futbolçuların, həm də baş məşqçi Elmar Baxşıyevin diqqətinə çatdırılıb. Ən qısa müddətdə böhrandan xilas olmalıyıq. Burda əsas məsuliyyət futbolçuların və məşqçi korpusunun üzərinə düşür. Məğlubiyyət olan yerdə, təbii ki, narazılıq olmalıdı. Çünki “Araz-Naxçıvan” yayda kifayət qədər sanballı, keyfiyyətli futbolçular ilə gücləndirilib. Komandanın Konfrans Liqasındakı çıxışı bizə yeni mövsümlə bağlı böyük ümidlər vermişdi. Ancaq indiki nəticələr və oyunlarda qeydə alınan statistik göstəricilər həyəcan təbili çalmağa əsas verir. Rəhbərlik durumdan qəti narazıdı. Məsuliyyət dərk olunmalı, istər məşq, istər oyun baxımından bütün problemlər aradan qaldırılmalıdı. Elmar Baxşıyevin taleyinə gəlincə, məğlubiyyət dünən yaşanıb. Qarşıdakı günlərdə, daha doğrusu, növbəti oyuna qədər müzakirələr olacaq. Durum barədə həm futbolçulara, həm də məşqçilərə xəbərdarlıq ediləcək. Hansısa qərar alınacağı halda ictimaiyyətə məlumat veriləcək”.
KƏNAN BAHADIR
