Bu gün Misli premyer-liqasında 31-ci tura start veriləcək.

Bu o deməkdi ki, elitada qalmaq uğrunda mübarizə aparan və avrokuboklara vəsiqə qazanmaq istəyən komandaların cəmi altı sınağı qalıb. Bu üzdən onlar hər matça daha məsuliyyətli yanaşmalı və nəticənin sərfəli olması üçün əlindən gələndən artığını etməlidi. Düzdü, “Səbail” üçün mövsümün bədbin notda başa çatacağını demək olar. Bayıl təmsilçisinin yalnız riyazi şansı qalıb ki, xal fərqini xeyli artıran “Kəpəz”lə “Sumqayıt”ın bundan sonra büdrəyəcəyini gözləməyə dəyməz. “Qarabağ”ın çempionluğu da şübhə doğurmur. Sonrakı üç pillə uğrunda mübarizə isə hələ davam edir. Aşağıda bəhs edəcəyimiz oyun məhz bu baxımdan çox önəmlidi.

Misli premyer-liqası
4-cü dövrə, 31-ci tur
18 aprel
Araz-Naxçıvan – Turan Tovuz 1:1
İssuf Paro, 53 - Faiq Hacıyev, 33
Qırmızı vərəqə: Vanderson Melo, 76 (Araz-Naxçıvan)
“Araz-Naxçıvan”ın bu rəqiblə ev oyunların balansı: 2:+1=0-1, 1:1.
2023/24 – 0:1; 2024/25 – 1:0.
Cəzalı: yoxdu.
“Futbol+”in proqnozu: 40-30-30.
Bakı, “Liv Bona Dea Arena”. Saat 19.00.

Bu oyunla bağlı vacib məqamlar var. Təbii ki, “Turan Tovuz” qələbəyə daha çox can atacaq. Axı “Araz-Naxçıvan” ölkə kuboku vasitəsi ilə də avrokuboklara vəsiqəyə iddialıdı. Düzdü, “qırmızı-ağlar”ın kuboku qazanıb-qazanmayacağı dəqiq deyil. Tarixində ilk dəfə ölkəmizi avrokuboklarda təmsil etmək niyyətində olan “qırmızı-ağlar” həm də mövsümü ilk “3-lük”də bitirməyə çalışır ki, necə deyərlər, gələcəyi “sığortalasın”. Amma onlar “Kəpəz”lə Tovuzdakı oyundan “sülh”lə ayrılmaqla bu yöndə şansını bir qədər azaltdı. Əlbəttə, Elmar Baxşıyevin komandasının xal itirməsi “Turan Tovuz” üçün şad xəbərdi. “Bozqurd” evdə “Sabah”ı məğlub etməklə iddialı rəqibinin premyer-liqa yoluyla avrokuboklara yollanmaq ehtimalını, demək olar ki, sıfra endirdi. Axı Masazır təmsilçisinin qalan 6 matçda 11 xallıq fərqi aradan qaldırması, bununla paralel ölkə kubokunda uğurlu nəticə qazanması mümkünsüzdü. Belədə tovuzlular üçün “yaşıl işıq yanıb” ki, bundan maksimum istifadə etmək lazımdı. Odu ki, Kurban Berdıyevin komandası da Mərdəkanda məhz qələbə uğrunda döyüşəcək. Naxçıvanlılar isə təbii ki, buna imkan verməməlidi. “Qırmızı-ağlar” uduzsa, “bozqurd”la aradakı xal fərqi 2-yə enəcək ki, növbəti oyunlarda “Turan Tovuz”un ilk “üçlüy”ə yüksəlməsi üçün ciddi maneə qalmayacaq. Ümumiyyətlə, bu matçı hər iki komanda üçün mövsümün ən taleyüklü sınaqlarından bir kimi xarakterizə edə bilərik. O başqa məsələ ki, Berdıyev belə əhəmiyyətli matçda cəzalı durumdadı. Hər halda, cümə gününü iplə çəkməyə dəyər!

KƏNAN BAHADIR