Misli premyer-liqasının 13-cü turunun dünən keçirilən “Qəbələ” – “Araz-Naxçıvan” (2:1) oyunu Elmar Baxşıyev üçün düşərli olmayıb.

“Football-plus.az” xəbər verir ki, “qırmızı-ağlar”ın baş məşqçisi Elmar Baxşıyevin komandasının məğlubiyyəti mütəxəssisin klubla bağlı taleyini təhlükəyə atıb.

Əslində hər şey oyun bitər-bitməz baş verib. Həmkarlarımızın iddiasına görə, matçı stadiondan izləyən Zaur Axundov baş məşqçinin fəaliyyətindən narazılığını dilə gətirib. Əlbəttə, o, haqsız deyil. Komanda son 6 matçda yalnız bir qələbə qazanıb. “Qırmızı-ağlar” 6-cı sıradadı və hadisələrin belə axarı klub rəhbərliyini qətiyyən qane edə bilməz. Odu ki, dünən rəhbərlik və baş məşqçinin iştirakıyla keçirilən iclasda Elmar Baxşıyevə xəbərdarlıq edilib. İdarəçilər mütəxəssisə həm komandanın oyun tərzindən, həm də nəticələrdən narazı qaldıqlarını, problemlərin ən qısa müddətdə aradan qaldırılmasının zəruriliyini bildiriblər.

Maraq üçün qeyd edək ki, “Araz-Naxçıvan” dekabrın 4-də ölkə kubokunun 1/8 finalında “Liv Bona Dea Arena”da “Kəpəz”lə qarşılaşacaq. Naxçıvanlıların Misli premyer-liqasının 14-cü turunda qarşılaşacağı rəqib də “sarı-göylər”di. Heç şübhəsiz, klub rəhbərliyi “Qəbələ”nin ardından daha bir elitada qalmaq uğrunda mübarizə aparan komandaya məğlubiyyəti həzm edə bilməz. Onu da nəzərə alaq ki, Gəncə təmsilçisinin baş məşqçisi vaxtilə “qırmızı-ağlar”ın baş məşqçi postunda Elmar Baxşıyevin əvəzlədiyi Azər Bağırovdu.

Öz aramızdı, deyəsən, Bağırov üçün qisas anı yetişib!

KƏNAN BAHADIR