Misli premyer-liqasının 2023/24 mövsümü maraqlı məcrada keçir. Mövsüm başlamamış çoxları güman edirdi ki, “Qarabağ”, “Sabah” və “Neftçi” arasında çempionluq, “Araz-Naxçıvan”la “Kəpəz” arasında isə elitada qalmaq uğrunda mübarizə gedəcək. Lakin ilk 8 turdan sonra fərqli mənzərə yaranıb.

Ən çox təəccübləndirən “Sabah”la “Araz-Naxçıvan”ın nəticələridi. “Bayquşlar”ın çıxışı o qədər də ürəkaçan deyil. Bununla bağlı dəfələrlə təhlillər yazmışıq. Bu dəfə isə yazı mövzusu “Araz-Naxçıvan”dı. “Qırmızı-ağlar” çempionata çox yaxşı başlayıb. Azər Bağırovun komandası 8 oyuna 13 xal yığmaqla 4-cü sırada qərarlaşıb.

Yay “transfer pəncərəsi” açılanda Muxtar Respublika təmsilçisində işlər qaydasında getmirdi. Baş məşqçi cəmi 6-7 futbolçu ilə məşq edirdi. Sonradan Azər Bağırov klubsuz qalan oyunçuları düşərgəyə dəvət edərək onları hər şeyin yaxşı olacağına inandırdı. Klub rəhbərliyindəki dəyişikliklər işlərin müsbətə doğru dəyişməsinə səbəb oldu. “Qırmızı ağlar”ın İdarə Heyətinin, Müşahidə Şurasının tərkibi formalaşdı. Ramin Axundov prezident seçildi. AZAL, “Neftçi”, “Keşlə”, “Şamaxı” kimi klublarda çalışmış Eldəniz Yusubov isə icraçı direktor təyin olundu. “Samaya” şirkəti “Araz-Naxçıvan”ın sponsoru oldu. Klubun büdcəsi formalaşdırıldı. Muxtar Respublika təmsilçisi 11 legioner transfer etdi. Azər Bağırov premyer-liqa təcrübəsi olan gənc və istedadlı futbolçuları öz ətrafına topladı. Bununla da “Araz-Naxçıvan” premyer-liqaya hazır oldu.

Yenə də çatışmayan məqamlar var idi. Azər Bağırov komandanı gec qurmuşdu, normal təlim-məşq toplanışı keçə bilməmişdi. Yeni transferlərin necə təsir bağışlayacağını yalnız rəsmi oyunlarda görmək mümkün olacaqdı.

Amma həm rəhbərlik, həm də baş məşqçi komandaya güvənirdi. Hətta Eldəniz Yusubovun “avrokuboklara vəsiqə qazanmaq uğrunda mübarizə aparacağıq”, - deyə açıqlama verməsini ictiamiyyət birmənalı qarşılamamışdı. Çünki azarkeşsiz, 12-14 gün ərzində qurulmuş kollektivin ilk “4-lük”də yer alacağını düşünmək mümkün deyildi. Lakin zaman keçdikcə “Araz-Naxçıvan” dövranın dəyişdiyini sübut etməyə başladı. Düzdü, komanda ilk oyunda “Turan Tovuz” önündə darmadağın oldu. Baxmayaraq ki, naxçıvanlılar yetərincə yaxşı oyun sərgiləmişdi. Həm debüt həyəcanı, həm də Semir Bukveçin fərdi səhvləri “qırmızı-ağlar”a baha başa gəlmişdi.

Sonrakı 7 turda isə komandanın əsl gücü ortaya çıxdı. “Araz-Naxçıvan” bu qarşılaşmaların 4-də qələbə qazandı, 1-də heç-heçə etdi, 2-də isə məğlub oldu. Naxçıvanlılar bu nəticələrlə bir çox klubların rəhbərlərinin, məşqçilərinin bəhanələrinin üstündən xətt çəkdi. Təlim-məşq toplanışı keçməyən, 12-14 gün ərzində qurulan kollektiv büdcəsi onlardan daha çox olan rəqiblərə toy tutur. Bu necə olur? Təbii ki, burda icraçı direktor Eldəniz Yusubovun xidmətləri danılmazdı. O, Azər Bağırovla məsləhətləşərək Kristian Avram, İqor Ribeyro, Numan Kurdiç, İsmail Azzaui, Məhəmməd Kadiri, Miço Kuzmanoviç, Melo Vanderson, Nuno Rodriges, Elviş Maşike kimi oyunçuları Azərbaycan premyer-liqasına gətirməyə razı saldı. Azər Bağırov isə əlində olan yerli futbolçularla əcnəbilərin vəhdətindən əla kollektiv formalaşdırdı.

Bir sözlə, “Araz-Naxçıvan” Azərbaycan futboldakı bir çox mifi dağıtdı. Naxçıvanlılar sübut edir ki, xaricdə təlim-məşq toplanışı keçmədən də normal komanda formalaşdırmaq olar. Üstəlik “premyer-liqamıza səviyyəli legioner gəlmir” fikri də yalandı.

İLKİN SULTANLI