Misli premyer-liqasında yeni “futbol ili”nin ilk oyununun ev sahibi “Araz-Naxçıvan”dı.

"Football-plus.az" xəbər verir ki, açılış matçında premyer-liqanın ötən mövsümünü qapayanlar – “qırmızı-ağlar”la “Qarabağ” üz-üzə gələcək. Oyun “CBC Sport”da canlı yayınlanacaq.

Misli premyer-liqası
1-ci dövrə, 1-ci tur
2 avqust
Araz-Naxçıvan – Qarabağ 1:4
Nuno Rodriqes, 86 - Redon Cica, 7. Riçard Almeyda, 9. Hamidu Keyta, 48. Abbas Hüseynov, 88.
“Araz-Naxçıvan”ın bu rəqiblə ev oyunlarının balansı: 4:+3=1-0, 9:6.
2000/01 – 2:1; 2001/02 – 3:2; 2023/24 – 2:1, 2:2.
Cəzalı: yoxdu.
“Futbol+”in proqnozu: 40-30-30.
Bakı. “Liv Bona Dea Arena”. Saat 20.00.

“Araz-Naxçıvan” premyer-liqanın yeni mövsümünə iddialı başlayacaq. Komandanın qarşısına avrokuboklara vəsiqə qazanmaq qoyulub. Məqsədə gedən yolun hamarlığı üçün istənilən şəraitin yaradıldığı da iddia edilir. İndi növbə baş məşqçi Elmar Baxşıyev və komandasına çatıb ki, özünü doğrultsun. Hələ yanvara qədər kollektivin Naxçıvana qayıda biləcəyi də deyilir. Hər halda, hadisələri qabaqlamadan oyuna keçid alaq.

Muxtar Respublika təmsilçisi mövsümün ilk matçını “doğma divarlar” arasında keçirəcək. Düzdü, şərti mənada. Elmar bəy yenilənmiş, həmçinin seçdiyi futbolçulardan qurulan kollektivlə həm qarşıdan gələn ölkə kubokunda, həm də premyer-liqada uğur qazanmağa çalışacaq. İlk sınaq “Qarabağ”a qarşıdı. Heyətini qorumağı bacaran rəqib ölkəmizin ən iddialısıdı.

Durum elədi ki, “köhlən atlar”ın hədəfini sorğulamağa ehtiyac yoxdu. Lakin aşkar səviyyə fərqinin özünü meydanda necə göstərəcəyini bilmirik. Axı Ağdam təmsilçisi hələ “Araz-Naxçıvan”ın meydanında üç xal qazanmayıb! Bu statistikanın nə dərəcədə dəyişəcəyinə şahidlik edəcəyiksə, komandalar mövsümə qələbəylə start vermək üçün əlindən gələni edəcək. Yenə də “Qarabağ”ın çərşənbə axşamı keçirilən Çempionlar Liqası oyununda bir qədər yorulduğu, böyük ehtimalla heyətdə rotasiyaların olacağını nəzərə alıb, “qırmızı-ağlar”ın xal qazanmaq şansından danışa bilərik.

Qeyd edək ki, turun qalan oyunları avqustun 3-4-də keçiriləcək.

KƏNAN BAHADIR