"İmişli" Bizon ölkə kubokunun 1/8 final mərhələsində "Sabah"a məğlub olaraq turnirdə mübarizəni dayandırıb.

"Football-plus.az" xəbər verir ki, "pələnglər"in baş məşqçisi Jorj Kaşkilya oyunsonrası mətbuat konfransında jurnalistlərin suallarını cavablandırıb:

- Komandam yaxşı oyun nümayiş etdirdi. Birinci hissədəki oyunumuzdan çox razı qaldım. Topa nəzarət edirdik. Yüksək təzyiqimiz öz nəticəsini verirdi. Sadəcə olaraq əlimizə düşən fürsətləri dəyərləndirə bilmədik. İkinci hissədə "Sabah" standart vəziyyəti yaxşı yerinə yetirdi və qol vurdu. Xarakterli komandayıq. Son dəqiqələrdə hesabı bərabərləşdirə bildik və oyunu əlavə vaxta apardıq. "Sabah" çox güclü komandadı, keyfiyyətli oyunçuları var. Fərdi ustalıq hesabına qol vurub önə keçdilər. Hər iki komanda növbəti mərhələyə layiq idi. Təəssüflər olsun ki, 1/4 finala bir komanda yüksəlir. "Sabah"ı təbrik edirəm.

- "Sabah"a ardıcıl iki məğlubiyyət komandaya necə təsir edəcək?
- Vacib oyunlardı. Amma komandaya mənfi təsir etməyəcək. Məğlubiyyətə baxmayaraq, yaxşı oyun göstərdik. İşimizi görməyə davam edəcəyik. İrəliyə baxmaq lazımdı.

- Qış fasiləsində legioner futbolçu transferi gözlənilir?
- Əlbəttə ki, komandanı gücləndirmək istəyərik. Amma qışda yaxşı oyunçu tapmaq çətindi. "İmişli" "Qarabağ", "Sabah" kimi böyük klub deyil.

- Komanda qış planları bəllidi?
- Bakıda məşq edəcəyik.