Derbidə heç-heçə, Mançester klublarının çətin qələbəsi - İCMAL
Premyer-liqada 13-cü tur güzəştsiz mübarizə şəraitində keçdi.
"Football-plus.az" xəbər verir ki, yeganə heç-heçə turun mərkəzi oyununda – London derbisində qeydə alındı.
Qeyd etməyə dəyər ki, “Çelsi” Kaysedonun birbaşa “qırmızı”sı üzündən 38-ci dəqiqədən azlıqda oynadı. “Liverpul” ardıcıl iki məğlubiyyətdən sonra səfərdə “Vest Hem” üzərində qələbə qazandı. Mançester klubları da qələbəyə sevindi. “Siti” “Lids”in müqavimətini qırdı, “Yunayted” “Kristal Pelas”la oyunda əzmkarlıq göstərdi.
Girişdə vurğuladığımız kimi, turun mərkəzi oyununda liderlər – “Arsenal”la “Çelsi” üz-üzə gəldi. Futbolçular ilk dəqiqələrdən güzəştə getmək niyyətində olmadığını göstərdi. Artıq 13-cü dəqiqəyə qədər üç futbolçu sarı vərəqə ilə cəzalanmışdı. 38-ci dəqiqədə “Çelsi” azlıqda qaldı. Ona görə ki, Kaysedo mərkəzdə açıq ayaqla Merinonun topuğuna zərbə vurdu. VAR otağından gələn mesajdan sonra Entoni Teylor ekvadorlunu meydandan qovdu. Fasilə ərəfəsində Martinelli hesabı aça bilərdi, ancaq Sançes yenə inamlı oynadı. 2-ci hissənin əvvəlində “zadəganlar” irəli çıxdı. Ceymsin künc zərbəsindən ötürməsindən sonra Çaloba fərqləndi. Ruhdan düşməyən “topçular” 10 dəqiqə sonra hesabı bərabərləşdirdi. Sona qədər hər iki komandanın fərqlənmək şansı olsa da, tablodakı rəqəmlər dəyişmədi. 1:1 oyunun axarına uyğun hesabdı.
“Vest Hem” – “Liverpul” oyunu çox aşağı tempdə başladı. Mersisaydlılar ilk təhlükəli vəziyyəti hissənin ortalarında yaratdı. İsak zərbə vursa da, “çərçivə”yə düşmədi. Fasilə ərəfəsində Virts də əlverişli imkanı qaçırdı. Yalnız 60-cı dəqiqədə çempion “çəkicdöyənlər”in qapısına yol tapdı. Qakponun ötürməsindən sonra İsak hesabı acdı. “Vest Hem”in oyunçuları hücumlar qurmağa çalışsalar da, Paketa onların məğlubiyyətdən qurtulmaqla bağlı bütün ümidlərini qırdı. Braziliyalı yarımmüdafiəçi sona 6 dəqiqə almış hakimlə danışığa görə ardıcıl iki sarı vərəqə aldı. “Liverpul” uzatma dəqiqələrində 2-ci qolu da vurdu.
“Lids”i qəbul edən MS ciddi çətinlik çəkdi. Artıq 1-ci dəqiqədə hesabı açan “şəhərlilər” hissənin ortalarında Qvardiolun sayəsində 2-ci qolu da vurdu. “Lids” ilk yarıda “çərçivə”yə bir zərbə də vurmamışdı. Qonaqların çalışdırıcısı Daniel Farke fasilədə iki dəyişlik etdi və bunlardan biri işə yaradı. Yenicə meydana çıxan Kalvert-Lüin 49-cu dəqiqədə Nunyeşin səhvindən yararlandı və intriqanı bərpa etdi. 68-ci dəqiqədə isə “Lids” penalti qazandı. Bu dəfə də baş rolda Kalvert-Lüin idi. “Nöqtə”yə yaxınlaşan Nmeça Donnarumma ilə ilk dueldən məğlub ayrılsa da, təkrar zərbəsi dəqiq oldu. Yalnız hesab bərabərləşəndən sonra “Siti”nin futbolçuları ayıldı. “Şəhərlilər” bu fəallığın nəticəsi kimi 1-ci uzatma dəqiqəsində yenidən irəli çıxdı. “Lids”in hesabı bərabərləşdirmək üçün gücü qalmamışdı.
“Yunayted” “Kristal Pelas”ın qonağı idi. İlk yarıda daha fəal təsir bağışlayan londonlular fasilə ərəfəsində hesabı açdı. Mateta özü qazandığı penaltini qola çevirdi. “Qırmızı şeytanlar” 2-ci hissəyə çox fəal başladı ki, bu da dərhal nəticədə əksini tapdı. 54-cü dəqiqədə Zirkzee “status-kvo”nu bərpa etdi. 9 dəqiqə sonra isə Amorimin komandası hesabda önə keçdi. Fernandeşin ötürməsindən sonra Maunt fərqləndi. MY əzmkar qələbə sayəsində 7-ci pilləyə yüksəldi.
“Tottenhem”in qara zolağı davam edir. “Mahmızlar” London derbisində “Fulhem”i qəbul etdi. Oyunun əvvəli “Tottenhem” üçün faciəvi alındı. Artıq 6-cı dəqiqəyə qədər “bağbanlar” iki qol vurmuşdu. Kudus 2-ci hissənin ortalarında intriqanı bərpa etsə də, “mahmızlar” bundan artığına qadir deyildi.
“Nyukasl” səfərdə “Everton”u darmadağın etdi. “Sağsağanlar” artıq ilk yarıda üç cavabsız qol vurdular. 58-ci dəqiqədə Tiav hesabı 0:4 etdi. “Everton”un oyunçularının, daha dəqiqi, Dyusberi-Hollun gücü təsəlli qoluna çatdı. “Brayton” da səfər qələbəsinə sevindi. “Nottingem Forest”lə oyunda hesabı hissənin sonunda De Keyper açdı. “Meşəçilər” hesabı bərabərləşdirmək üçün irəli atıldı, ancaq Simasın 88-ci dəqiqədəki qolu oyunun taleyinə aydınlıq gətirdi.
“Bornmut”u qəbul edən “Sanderlend”in futbolçuları növbəti dəfə xarakter göstərdi. “Albalılar” 15-ci dəqiqədə qədər iki qol vurdu. Xüsusən də Adamsın 43,3 metrdən vurduğu qolu qeyd etməyə dəyər. Amma fasiləyə qədər fərqi azaldan “Sanderlend” 2-ci hissədə daha iki dəfə fərqlənməklə əzmkar qələbə qazandı.
“Bernli”ni qəbul edən “Brentford” və aşkar autsayder “Vulverhempton” ilə qarşılaşan “Aston Villa” da bu tur hesabına 3 xal yazdı.
13-cü tur
Çelsi – Arsenal 1:1
Çaloba, 48 – Merino, 59. (39820)
Çelsi: Sançes, Hüsto, Fofana, Çaloba, Kukurelya, Ceyms, Kaysedo, Estevao (Qarnaço, 46), Fernandes, Neto, Pedro (Delap, 55).
Arsenal: Rayya, Timber, Moskera, İnkapye, Kalafyori (Lüis-Skelli, 46), Eze (Dyökereş, 72), Subimendi (Edeqor, 57), Rays, Saka, Merino, Martinelli (Madueke, 57).
Vest Hem – Liverpul 0:2
İsak, 60. Qakpo, 90+3. (62469)
Liverpul: Alisson, Qomes, Konate, Van Diyk, Kerkez (Robertson, 85), Qravenberx, Makallister, Qakpo, Soboslai, Virts (Cons, 76), İsak (Ekitike, 68).
Mançester Siti – Lids 3:2
Foden, 1; 90+1. Qvardiol, 25 – Kalvert-Lüin, 49. Nmeça, 68. (52483)
MS: Donnarumma, Nunyeş, Diaş, Qvardiol, O’Rayli, Reynders (Şerki, 75), Niko, B.Silva (Marmuş, 89), Foden, Holann, Dokyu (Stounz, 90+6).
Kristal Pelas – Mançester Yunayted 1:2
Mateta, 36-p. – Zirkzee, 54. Maunt, 63. (25832)
MY: Lammens, Yoro (Mazraui, 55), Şou (Martines, 83), Dyallo (Dorqu, 90+1), Kazemiro, Fernandeş, Dalot, Mbemo (Maynu, 90+1), Maunt, Zirkzee.
Tottenhem – Fulhem 1:2
Kudus, 59 – Tete, 4. Uilson, 6. (60546)
Tottenhem: Vikario, Porro, Danso, Van de Ven, Udoci (Tel, 85), Palyinya (Bentankur, 60), Qrey (Odober, 60), Kudus, Berqvall (Sarr, 77), Rişarlison (Simons, 60), Kolo-Muani.
Brentford – Bernli 3:1
Tyaqo, 81-p.; 86. Uattara, 90+2 – Flemminq, 85-p. (17176)
Sanderlend – Bornmut 3:2
Le Fe, 30-p. Traore, 46. Brobbi, 69 – Adli, 7. Adams, 15. (46973)
Everton – Nyukasl 1:4
Dyusberi-Holl, 69 – Tiav, 1; 58. Mayli, 25. Voltemade, 45. (51135)
Aston Villa – Vulverhempton 1:0
Kamara, 67. (42139)
Nottingem Forest – Brayton 0:2
De Keyper, 45+1. Simas, 88. (30522)
1. Arsenal 13 9 3 1 25-7 30
2. Mançester S. 13 8 1 4 27-12 25
3. Çelsi 13 7 3 3 24-12 24
4. Aston Villa 13 7 3 3 16-11 24
5. Brayton 13 6 4 3 21-16 22
6. Sanderlend 13 6 4 3 17-13 22
7. Mançester Y. 13 6 3 4 21-20 21
8. Liverpul 13 7 0 6 20-20 21
9. Kristal Pelas 13 5 5 3 17-11 20
10. Brentford 13 6 1 6 21-20 19
11. Bornmut 13 5 4 4 21-23 19
12. Tottenhem 13 5 3 5 21-16 18
13. Nyukasl 13 5 3 5 17-16 18
14. Everton 13 5 3 5 14-17 18
15. Fulhem 13 5 2 6 15-17 17
16. Nottingem Forest 13 3 3 7 13-22 12
17. Vest Hem 13 3 2 8 15-27 11
18. Lids 13 3 2 8 13-25 11
19. Bernli 13 3 1 9 15-27 10
20. Vulverhempton 13 0 2 11 7-28 2
Bombardirlər: Holann (MS) – 14, Tyaqo (Brentford) – 11, Uelbek (Brayton), Mateta (Kristal Pelas) - 7.
Turun rəqəmi
300 – Lük Şou MY-nin heyətində oyun sayını bu həddə çatdırdı. 30 yaşlı müdafiəçi 2014-cü ildən bu klubun şərəfini qoruyur. MY ilə İngiltərə Superkubokunu, Liqa kubokunu və Avropa Liqasını qazanıb.
Turun ulduzu
File Foden (MS) – Holannın oyununun alınmadığı məqamda komandasının köməyinə çatdı. “Lids”lə oyunda dubl etdi. Bu temp ilə davam edərsə, yığmanın məşqçi korpusunun diqqətini çəkə bilər.
Turun sitatı
Con Terri, “Çelsi”nin sabiq kapitanı:
“Düşünürəm ki, rəqibdən daha yaxşı oynadıq, bir saatdan artıq azlıqda olmağımıza baxmayaraq. İlk yarıda yalnız bir komanda təşəbbüsə malik idi, qələbəyə can atırdı, aqressiv oynayırdı. Təəssüf ki, hakimlər ilk 15 dəqiqədə üç sarı göstərməklə oyunu öldürdülər. Ancaq Kaysedonun qovulmasıyla bağlı mübahisə etməyəcəm. Yalnız bir komanda qələbə qazanmağa çalışırdı ki, o da “Çelsi” idi. Biz azarkeşlər məmnunluq duymalıyıq. Ona görə ki, son həftələrdə hamıya qalib gələn “Arsenal” çempionluq yarışında bizdən uzaqlaşa bilmədi”.
Faktlar
* Salah Slotun “sükan arxasında” olduğu 51-ci oyunda ilk dəfə “Liverpul”un start heyətinə düşmədi. Misirli vinger ötən mövsümün 38, bu mövsümün 12 oyununda ilk dəqiqədən meydanda olmuşdu.
* Fernandeş MY-nin heyətində premyer-liqada məhsuldar ötürmə sayına görə 4-cü pilləyə yüksəldi. “Kristal Pelas”la oyunda iki məhsuldar ötürmə verən portuqaliyalı ulduz belə ötürmələrin sayını 56-ya çatdırdı. O, bu göstəricidə Pol Skoulzu (55) arxada qoydu. İlk üç pillədə Rayan Giqqz (162), Ueyn Runi (93) və Devid Bekhem (80) qərarlaşıb.
* “Çelsi”nin oyunçuları bu mövsüm artıq bütün ötən mövsümdəkindən çox qırmızı vərəqə alıb. Kaysedo meydandan qovulan 4-cü oyunçu oldu. Ona qədər Sançes, Çalova və Hüsto da belə cəzalanmışdı. “Çelsi”nin oyunçuları ötən mövsüm cəmi iki dəfə qovulmuşdu.
* Emeri “Aston Villa”nın premyer-liqada qələbə sayına görə rekordunu təkrarladı. Brimingemiləri 114-cü oyuna çıxaran ispaniyalı mütəxəssis 61-ci qələbəsini qazandı. O, Con Qreqori ilə Martin O’Nilin rekordunu təkrarladı. Emeri 2022-ci ildən “Aston Villa”nı çalışdırır.
Oyundan sonra
Arne Slot, “Liverpul”un baş məşqçisi:
“Əlbəttə, bir yüngüllük hiss edirik. Bu qədər məğlubiyyətdən sonra qələbə çox vacib idi. Rəqibə bir qol vəziyyəti də yaratmağa imkan vermədik. Komanda istədiyim kimi oynadı. İsakın fərqlənməsi də önəmli hadisədi”.
Entso Mareska, “Çelsi”nin baş məşqçisi:
“Düşünürəm ki, doğru istiqamət üzrə irəlilədiyimizi göstərdik. Möhtəşəm oyun oldu, bərabər heyətlərlə oynayanda biz daha yaxşıydıq. Azlıqda qalanda vəziyyət çətinləşir, ancaq bunun öhdəsindən əla gəldik. Daha yaxşı qərarlar verməyə, boş zonalar tapmağa çalışırdıq. Bu gün qalib gələ bilməsək də, nəticədən razı olmalıyıq”.
Mikel Arteta, “Arsenal”ın baş məşqçisi:
“Çətin oyun idi. Hər iki komanda intensiv və aqressiv oynayır. Hər “sürüşmə” fəndində belə oyunun önəmi duyulurdu. Bu da normaldı, hər birimiz premyer-liqada çempionluq üçün oynayırıq. Sarı vərəqəsi olan dörd oyunçumuz var idi. Açıq-aydın görünürdü ki, rəqib onlardan birinin qovulmasına, heyətlərin bərabər olmasına çalışır. İkinci hissənin əvvəlində toparlana bilmədik, belədə rəqib qol vurdu. Emosiyaların öhdəsindən gəlməliydik. Özümüzə gəlmək üçün müəyyən vaxt tələb olunurdu. Ardından gözəl qol vurduq və daha iki-üç yaxşı vəziyyət yaratdıq. Həftə həçm emosional, həm də fiziki baxımdan ağır keçdi, çətin rəqiblərlə oynadıq. Bura səfər ərəfəsində iki aparıcı oyunçumuzu itirdik. Rəqiblə müqayisədə bərpa üçün vaxtımız bir gün az olmuşdu. “Çelsi” burda – “Stemford Bric”də yenicə Avropanın ən yaxşı komandalarından biri “Barselona”nı məğlub edib. Bəzi oyun aspektlərində çətinlik çəkəcəyimizi bilirdim. İkinci hissənin əvvəlində rəqibin irəli çıxması bizdə emosional durum yaratdı, sonra vəziyyəti qaydasına sala bildik”.
Digər xəbərlər
