Premyer-liqanın 31-ci mövsümünün ilk turunda həm çəkişməli oyunlar, həm də yetərincə gözlənilməz nəticələr var idi.

Çətin ki, kimsə “Liverpul”un elitaya yenicə dönən “Fulhem”i məğlub edə bilməyəcəyini düşünəydi. “Mançester Yunayted”in Ten Haqın debüt oyununda “Brayton”a uduzması da sensasiyadı. Çempion “Mançester Siti” Holannın parladığı oyunda “Vest Hem” qarşısında elə bir çətinlik çəkmədi. Londonun şimalını təmsil edən hər iki komanda qələbə qazandı. “Tottenhem” “Sauthempton”la oyunda fırtına kimi əsdi, “Arsenal” “Kristal Pelas”la derbidə çox güc sərf etdi. Paytaxtın daha bir komandası – “Çelsi” də “Everton”u çətinliklə yendi. “Lester” “Brentford”la oyunda iki top üstünlüyünü əldən verdi, “Lids” isə “Vulverhempton” üzərində əzmkar qələbə qazandı. Ümumiyyətlə, ilk tur məhsuldar keçdi, yalnız bir oyunda 1 qol vuruldu.

* Salah ardıcıl 6-cı dəfə mövsümün ilk oyununda fərqləndi. Misirli 2017-20 aralığında ilk turda bir qol vurubsa, 2020/21 mövsümünün startında het-trik edib. Sonrakı iki mövsümə də qolla başlayıb.

* “Çelsi” Tuxel dönəmində çoxlu penalti qazanır. Onun “sükan arxasına” keçdiyi ötən il yanvarın 26-dan bəri londonluların xeyrinə 15 penalti təyin olunub ki, bu da premyer-liqada ən yüksək göstəricidi.

* Ten Haq MY-nin 2014-dən bəri premyer-liqadakı debüt oyununda uduzan ilk baş məşqçisi oldu. Sonuncu dəfə Lui van Qal belə uğursuzluq yaşamışdı. Onun komandası 2014-ün avqustunda “Suonsi”yə 1:2 uduzmuş, həmin mövsümü 4-cü yerdə bitirmişdi.

* “Old Trafford”da keçirdiyi əvvəlki 6 oyunun hamısında uduzan “Brayton”, nəhayət, burda ilk qələbəsini qazandı.

* Holann MS-nin heyətində premyer-liqada keçirdiyi ilk oyunda dubl etdi və klub tarixində bunu bacaran 2-ci futbolçu oldu. 2011-də Aquero da dublla başlamışdı.