“Çelsi” artıq sıradan bir rəqibdi - TURUN ŞƏRHİ
34-cü turun son oyununda “Çelsi”yə qalib gələn “Arsenal” zirvəni özünə qaytardı. Təbii ki, bu liderlik şərti xarakter daşıyır. Dünən axşam 28-ci turdan təxirə salınan oyunda “Vest Hem”i qəbul edən “Mançester Siti” qələbə sayəsində liderliyi bərpa edə bilərdi.
London derbisində hansısa başqa nəticə gözləməyə dəyərdimi? Çətin ki! “Çelsi” həm oyun baxımından, həm də psixoloji planda dərin böhran yaşayır. “Zadəganlar” səfər oyununa da süst başladı və artıq 34-cü dəqiqədə qapısında 3-cü qolu gördü. Edeqorun dublundan sonra “Çelsi” tam ruhdan düşdü. Yalnız Kepanın inamlı oyunu fasiləyə qədər hesabın 3:0-dan artıq olmasına imkan vermədi. 0:3-dən sonra qonaqlar bir qədər canlandı. Ancaq komandanın durumu elə bərbaddı ki, yalnız darmadağından qaçmağa ümid edə bilərdi. Belə görünür ki, “Çelsi” üçün mövsümün elə indi bitməsi yaxşı olardı. Rəhbərlik komandanı dağıdar və yeni baş məşqçi tapardı. Son oyunlardakı uğursuzluqları nəzərə alsaq, “Arsenal” bu qələbə ilə bir qədər özünə gəldi. Ancaq qlobal baxımdan heç nə dəyişməyib. Yalnız hansısa möcüzə olmalıdı ki, “şəhərlilər” çempionluğu əldən versin.
34-cü turun oyunu
Arsenal – Çelsi 3:1
Edeqor, 18; 31. Jezus, 34 – Madueke, 65. (60144)
Arsenal: Remsdeyl, Zinçenko (Tirni, 73), Qabriel (Holdinq, 85), Kivyor, Uayt, Edeqor, Jorjinyo (Parti, 86), Caka, Trossar (Martinelli, 59), Jezus, Saka (Nelson, 73).
Çelsi: Kepa, Çiluell, Silva, Fofana (Çaloba, 86), Aspilikueta, Kante, Fernandes (Mudrik, 71), Kovaçiç, Sterlinq (Qallaher, 71), Obameyanq (Haverts, 46), Madueke (Ziyeş, 79).
1. Arsenal – 78 (34), 2. Mançester Siti – 76 (32)... 12. Çelsi – 39 (33)...
Bombardir: Holann (Mançester Siti) – 34.
Oyundan sonra
Mikel Arteta, “Arsenal”ın baş məşqçisi:
“Düşünürəm ki, komanda ilk 60 dəqiqədə çox yaxşı oynadı. Sürət, ustalıq, hərəkətlilik, iki gözəl qol – azarkeşlərlə eyni dalğadaydıq və möhtəşəm atmosfer yaratmışdıq. Fanatlar bizi əla dəstəkləyir, turnir cədvəlində 1-ci yerdə qərarlaşmağı haqq etmək istəyirdik. Bunu bacardıq, razıyıq”.
Frenk Lempard, “Çelsi”nin baş məşqçisi:
“İlk yarını pis keçirməyimiz hesabda əksini tapdı. İlk yarıda bizə qarşı oynamaq bütün aspektlər baxımından xoş idi. 2-ci hissədə isə komanda kimi oynamağa başladıq. Bunu qəbul etmək çətindi. Ona görə ki, biz də qalib gəlmək istəyirik”.
Faktlar
* “Çelsi” “Arsenal”a qarşı son 7 oyunda yalnız bir qələbə qazanıb. “Topçular” 2020-ci il avqustun 1-dən bəri çempionatda və ölkə kubokunda 6 qələbəni bayram edib. “Göylər”in yeganə qələbəsi isə 2021-ci il avqustun 22-də qeydə alınıb.
* Lempard “Çelsi”nin baş məşqçisi kimi ardıcıl 6-cı, ümumilikdə ardıcıl 10-cu məğlubiyyətlə barışdı. Seriyanın əsası cari mövsümdə - mütəxəssis “Everton”un “sükanı arxasında” olarkən qoyulub. O, Liverpul klubundan ardıcıl 4 məğlubiyyətdən sonra qovulub. Lempard 2005-ci ildən bəri premyer-liqanın bir mövsümündə ardıcıl 10 oyunda uduzan ilk məşqçidi. Həmin il isə onda “Sanderlend”ə rəhbərlik edən Mik Makkarti belə uğursuzluqla üzləşib.
Turun rəqəmi
10- cari mövsümdə London təmsilçiləri üzərində qələbə sayını bu həddə çatdıran “Arsenal” paytaxtın ən güclü klubudu. Mövsüm ərzində London derbilərində 10 qələbə İngiltərə rekordudu. “Topçular” cari mövsümdə “Fulhem” (2:1, 3:1), “Tottenhem” (3:1, 2:0), “Kristal Pelas” (4:1, 2:0) və “Çelsi”ni (3:1, 1:0) iki dəfə məğlub edib. “Brentford” (1:1, 3:0) və “Vest Hem” (3:1, 2:2) ilə oyunlarda isə qələbə və heç-heçə qeydə alınıb.
Turun ulduzu
Denni Uelbek (Brayton) – “qağayılar”ın heyətində sanki ikinci gəncliyini yaşayır. “Vulverhempton”la oyunda komandasının əsas zərbə gücü idi. Dubl etdi və Undava dabanla qol ötürməsi verdi. Meydanda cəmi 56 dəqiqə qalsa da, qələbəyə böyük töhfə verdi.
Turun sitatı
Hari Nevill, “Mançester Yunayted”in sabiq oyunçusu:
“Düşünürəm ki, “Mançester Siti” çempionluğu qazanacaq. Ancaq hər şey baş verə bilər. Komandanın necə irəli çıxdığını, sonra isə problemlərlə üzləşdiyini son həftələrin “Arsenal”ı üzərində gördük. 2012-də - “Siti” ilk dəfə çempion olanda “Yunayted” uzun müddət irəlidə idi, ancaq “şəhərlilər” lideri haqladı”.
Digər xəbərlər
