Braziliyanın “Flamenqo” klubunda çıxış edən “Qarabağ”ın sabiq hücumçusu Juninyo Avropa Liqasında “Bayer-04”ə vurduğu qol epizodunu sosial şəbəkə səhifəsində paylaşıb. Braziliyalının bu paylaşımı “Qarabağ” azarkeşləri arasında onun mümkün qayıdışı ilə bağlı müzakirələri yenidən alovlandırıb.

Ağdam klubu yay transfer dövründə Juninyonu heyətinə qatmaq istəsə də, “Flamenqo”nun baş məşqçisi Felip Luis buna mane olmuşdu.
Braziliya mətbuatı da bir müddət əvvəl 28 yaşlı forvardın qış “transfer pəncərəsi”ndə komandasını dəyişə biləcəyini yazmışdı. Səbəb kimi isə onun “Flamenqo”nun əsas heyətində yer ala bilməməsi, hətta komandanın 23 nəfərlik iştirak ərizəsinə belə daxil edilməməsi göstərilmişdi. Juninyonun “Qarabağ”a qayıtmaq ehtimalı real variantlardan biri kimi görünür.

Xatırladaq ki, braziliyalı futbolçu 2023-cü ilin yayından 2025-ci ilin yanvarına qədər “Qarabağ”da çıxış edib. Daha sonra 5 milyon avro müqabilində “Flamenqo”ya transfer olunub.