Bu ilin əvvəlində transfer söhbətlərinin əsas qəhrəmanı Juninyo Olavio idi. Uzun müddət adı “Sevilya” ilə yanaşı hallanan braziliyalı hücumçu yanvarın 13-də “Flamenqo” ilə uzunmüddətli, daha dəqiqi, 3 illik müqavilə bağladı. Amma “Qarabağ”dan fərqli Braziliyada onun günü heç də xoş keçmir.

“Qarabağ”ın sabiq hücumçusu tezliklə indiki komandasından ayrıla bilər. Bu barədə Braziliya mətbuatında xəbərlər yayılıb. “Football-plus.az” xəbər verir ki, futbolçu “instaqram" səhifəsində paylaşdığı bütün şəkil və videoların şərh bölməsini bağlayıb. Buna səbəb “Flamenqo” azarkeşlərinin futbolçuya ünvanladığı sərt tənqid və təhqirlərdi. Azarkeşlərin fikrincə, futbolçu ona ödənilən transfer dəyərini haqq etmir. Baş məşqçi Felipe Luis də futbolçunun performansından narazıdı.

“Flamenqo”nun formasını ümumilikdə 18 dəfə geyən 28 yaşlı mərkəz hücumçusu bu oyunlarda yalnız 3 qolla yadda qala bilib. Braziliyanın A seriyasında cəmi 4 oyuna çıxıb, bir oyunda start heyətində yer alıb, heç bir məhsuldar hərəkətlə yadda qalmayıb.

Qeyd edək ki, Juninyo “Qarabağ”ın heyətində meydana çıxdığı 48 oyunda 23 qol vurmağı bacarıb.

MÜZƏFFƏR QULUZADƏ