''Liverpul'' premyer-liqada bərbad mövsüm keçirməkdə davam edir.

ÇL-də baxımlı və məhsuldar oynayan mersisaydlılar daxili çempionatda məğlubiyyətləri sıralayır. Özü də ortabab rəqiblərlə oyunlarda. Ötən tur səfərdə sonuncu pillədəki ''Nottingem Forest''ə minimal hesabla uduzan Yürgen Kloppun komandası bu dəfə evdə ''Lids''ə boyun əydi (1:2). Halbuki tura düşmə zonasında daxil olan ''Lids'' son 5 turun hamısında uduzmuşdu! ''Liverpul''un premyer-liqa çərçivəsində evdəki 29 oyunluq məğlubiyyətsiz seriyası (22 qələbə, 7 heç-heçə) qırıldı. Ən əsası Vircil van Diykin möhtəşəm seriyasına son qoyuldu.

2018-in yanvarından ''qırmızılar''ın şərəfini qoruyan niderlandlı müdafiəçi indiyə qədər bu klubda çempionat çərçivəsində ev məğlubiyyəti yaşamamışdı. Təcrübəli futbolçu buna qədər 70 ev oyunundan 59 qələbə, 11 heç-heçə ilə ayrılmışdı və 71-ci oyunda ilk məğlubiyyətini yaşadı. Ümumilikdə Van Diyk ''Liverpul''un heyətində 199 rəsmi oyun keçirərək 17 qol, 11 məhsuldar ötürmə ilə fərqlənib.