Məlum olduğu kimi Türkiyə yığması DÇ-2026-nın seçmə mərhələsində İspaniya ilə 2:2 bərabərə qalaraq qrupu ikinci pillədə tamamladı.

"Football-plus.az" xəbər verir ki, Sevilya şəhərindəki ''La Kartuxa'' stadionunda oynanılan matçda qardaş ölkənin komandasının oğurluq hadisəsi ilə üzləşdiyi məlum olub. Belə ki, türkiyəli futbolçular üçün ayrılan paltardəyişmə otağından bəzi dəyərli əşyaların itibmiş. İspaniya mətbuatının polislərdən alaraq paylaşdığı xəbərə görə itən əşyalar arasında dəyəri 200 min avro olan lüks saat və hər birinin dəyəri 60 min avro olan iki üzük də olub. Ümumilikdə 320 min avro dəyərində əşyalar itib.

Yerli qaynaqların məlumatına görə Türkiyə düşərgəsi ilk öncə bunun sadəcə bir unutqanlıq olduğunu düşünüb. Onlar İspaniya yığmasının rəsmilərinə bəzi əşyaların paltardəyişmə otağında unudulduğunu bildiriblər. Belə hallar futbolda tez-tez baş verir. Ancaq ertəsi gün qarşı tərəf paltardəyişmə otağını ələk-vələk etdikdən sonra belə desək, işin rəngi dəyişib. Əşyalar tapılmayınca oğurluq barədə polisə məlumat verilib. İspaniya polisi əməliyyata başladıqdan qısa müddət sonra sevindirici xəbər gəldi. Belə ki, həm saatın, həm üzüklərin, həm də digər əşyaların tapıldığı barədə məlumat gəldi.

Ancaq məsələni törətməkdə şübhəli bilinən şəxslərlə bağlı hələ məsələ bitməyib. Çünki oğruların stadionun bəzi təhlükəsizlik işçiləri, eləcə də həmin an paltardəyişmə otağına görə cavabdehlik daşıyan şəxslərlə əlbir olub-olmadığı araşdırılır. Hələlik bir nəfər həbs olunub. Amma həbs edilənlərin sayının artacağı istisna edilmir.