Türkiyə çempionatının 25-ci turunda oynanılan və qolsuz başa çatan ''Qalatasaray'' - ''Fənərbaxça'' derbisində məlum olduğu kimi 55 ildən sonra bir ilk yaşandı.

Oyunu sloveniyalı Slavko Vinçiç idarə etdi və bu turnirdə 1970-dən bu yana ilk dəfə bir matçda əcnəbi hakim fit sahibi oldu.

''Football-plus.az'' xəbər verir ki, 45 yaşlı Vinçiçin bu oyuna görə aldığı qonorar bəlli olub. UEFA-nın ən güvəndiyi hakimlərdən olan, Çempionlar Liqası və Avropa Liqasının finalını idarə edən Vinçiç İstanbul derbisinə görə 10 min avro qazanıb! Üstəlik Türkiyədə keçirdiyi hər gün üçün ona 800 avro xərclik pulu verilib.

Maraq üçün bildirək ki, Türkiyə çempionatında oyun idarə edən yerli hakimlərə 52500 lirə, yəni 1374 avro verilir. Avrokubokda isə bir oyun idarə edən hakim 6400 avro qazanır. Yəni Vinçiç avrokubok matçından 3600 avro daha çox pul qazandı.

Ümumilikdə o, nəticəyə təsir edən səhvə yol verməsə də, verdiyi və vermədiyi bəzi qərarlar müzakirəyə səbəb oldu. Tanınmış hakim ümumilikdə 35 dəfə qayda pozuntusu qeydə aldı və 7 sarı vərəqə göstərdi.

ƏLİ