''Yuventus'' ilə Kənan Yıldız arasında yeni müqavilə ilə bağlı aparılan danışıqlarda ciddi fikir ayrılığı yaşandığı məlum olub.

"Football-plus.az" xəbər verir ki, 20 yaşlı ulduz son dönəmlərdə sərgilədiyi oyunla həm ''Yuve''nin, həm də Türkiyə yığmasının liderlərindən birinə çevrilib. Amma məsələ burasındadı ki, Kənan Turin nəhəngində ən az maaş alan futbolçulardandı. Onun illik qazancı yalnız 1,7 milyon avrodu. Bu isə Kənanı və ailəsini qane etmir.

İstedadlı futbolçu təxminən bu yay komandaya transfer edilən Conatan Davidin maaşına, yəni 6 milyon avroya yaxın bir məbləğ tələb edir. Amma ''Yuve'' rəhbərliyi bununla razılaşmır. Eləcə də bonus şərtlərində də anlaşmazlıq var.

İddialara inansaq, tərəflər arasında sentyabrın əvvəllərindən bu yana aparılan danışıqlar dayandırılıb! Kənanın indiki müqaviləsi zatən 2029-a qədər nəzərdə tutulub. Tərəflər yeni şərtlərlə müqavilənin müddətini birillik uzatmaq istəyirdilər. Amma Kənanın menecerinin tələb etdiyi məbləğ ilə rəhbərliyin təklif etdiyi məbləğ arasında təxminən 1 milyon avroluq fərq var.

Digər nəhənglər isə türkiyəli vingeri diqqət mərkəzində saxlamaqda davam edir. Yayda bu futbolçu üçün 67 milyon avro təklif edən ''Çelsi''nin Yıldıza marağı azalmayıb. Eləcə də ''Arsenal'' və ''Real'' pusquda dayanıb. Hazırda 75 milyon avroluq dəyəri ilə tarixin ən bahalı türkiyəli futbolçusu statusunda olan Kənan Yıldızın başqa kluba keçidinin 100 milyon avroya başa gələcəyi istisna edilmir.

O, bu mövsüm ''Yuve''də 18 rəsmi oyunda aktivinə 6 qol, 6 məhsuldar ötürmə yazıb.