Karyerasını ''Yuventus''da davam etdirən Türkiyə yığmasının üzvü Kənan Yıldız ilə bağlı maraqlı xəbər var.

"Football-plus.az" xəbər verir ki, mövsüm tamamladıqdan sonra ''transfermarkt'' hər çempionatda çıxış edən oyunçuların transfer dəyərini yeniləyib.

A seriyasında da oyunçuların yeni dəyəri bəlli olub. Kənan Yıldızın dəyəri 45 milyon avrodan 50 milyon avroya qalxıb. 20 yaşlı vinger bununla da adını Türkiyə futbolu tarixinə yazdırıb. O, indiyə qədər ən yüksək transfer dəyərinə malik olan türkiyəli futbolçu kimi tarixə düşüb!

Ötən mövsüm bütün turnirləri nəzərə almaqla aktivinə 9 qol, 7 məhsuldar ötürmə yazan Yıldız ''Yuve''yə 2022-ci ildə ''Bavariya''dan gəlib və həmin vaxtdan bu yana ilbəil səviyyəsini artırır. O artıq Türkiyə yığmasının da aparıcı üzvlərindən biridi.

Beləliklə, Kənanın 50 milyon avroluq dəyəri bu günə qədər Türkiyə futbolunda görünməmiş bir məbləğ kimi tarixə düşdü. İndiyə qədər türkiyəli futbolçunun maksimum dəyəri 45 milyon avro olmuşdu. Buna Hakan Çalhanoğlu ilə Arda Gülər nail olub. Hərçənd Ardanın yaşını nəzərə alsaq, onun Kənanın rekordunu yeniləyəcəyi istisna edilmir.

Qeyd edək ki, bu siyahıya yalnız Türkiyə yığmasında oynamağa üstünlük verən türkiyəli futbolçular daxildi. Çünki Almaniya yığmasına üstünlük verən əslən türkiyəli oyunçulardan İlkay Gündoğanın dəyəri 47 milyon avroya, Məsut Özilin dəyəri 50 milyon avroya çatdığı vaxtlar olub.