''Yuventus''un heyətində sərgilədiyi oyunla dəyərini və səviyyəsini günü-gündən artıran Kənan Yıldız ilə bağlı yeni xəbər var.

Sentyabrdan bu yana rəhbərliklə türkiyəli ulduz arasında yeni müqavilə ilə bağlı danışıqlar aparılır. Danışıqların tezliklə yekunlaşacağı gözlənilirdi. Ancaq ''Qazetto dello Sport''un yazdığına inansaq, tərəflər yeni maaşla bağlı məsələdə heç cür ortaq məxrəcə gələ bilmir.

Türkiyə yığmasının üzvünün indiki illik maaşı 1,5 milyon avrodu. ''Yuventus'' bu məbləği 3 dəfədən də çox artıraraq 20 yaşlı vingerə illik 5 milyon avro təklif edib. Üstəlik ona müxtəlif bonuslar da təklif olunub. Ancaq Kənanın atası Əngin Yıldız bu təklifi bəyənməyib. O, oğlunun son dönəmlərdə sərgilədiyi performansı və yüksəldiyi səviyyəni əsas gətirərək daha böyük məbləğ tələb edir. Kənan Yıldıza ''Liverpul'', ''Mançester Siti'', ''Bavariya'', ''Çelsi'', ''Arsenal'' və PSJ kimi nəhənglər maraq göstərir. ''Yuventus'' fanatlar arasında əfsanəvi Alessandro Del Pyeronun davamçısı kimi qəbul olunan gənc ulduzunu satmaq istəmir. Ancaq Turin nəhənginin 75-80 milyon avroluq təklifi də geri çevirəcəyi inandırıcı görsənmir.

Yeri gəlmişkən, bu mövsüm 7 rəsmi oyunda aktivinə 2 qol, 4 məhsuldar ötürmə yazan Kənan Yıldızın ''transfermarkt'' tərəfindən açıqlanan yeni dəyəri 75 milyon avrodu. Bu göstərici ilə o, Arda Güləri (60 milyon avro) geridə qoyaraq Türkiyə futbolu tarixinin ən dəyərli futbolçusuna çevrilib!