A seriyasında 31-ci turun oyunlarından sonra turnir cədvəlinin ilk üç pilləsində dəyişiklik baş vermədi.

"Football-plus.az" xəbər verir ki, buna səbəb liderlər qrupundakı komandaların qələbə qazanması oldu. Nəticədə lider “Palmeyras” ilə “Flamenqo” arasındakı bir xallıq fərq qorundu.

Əvvəlki turda vahid liderliyi ələ alan “Palmeyras” səfərdə “Juventude” ilə qarşılaşdı. B seriyasına düşməyə əsas namizədlərdən olan meydan sahibləri güclü rəqibinə qarşı bacardığı qədər müqavimət göstərdilər. Lakin nəticə gözlənildiyi kimi oldu. Bruno Rodriges ilə Felipe Andersonun hər hissədə vurduqları qollar san paulululara qələbə qazandırdı. Abel Ferreyranın komandası inamlı qələbə ilə liderliyi qorudu.

Liderin əsas izləyicisi də turu maksimum xalla başa vurdu. “Flamenqo”nun evdə “Sport Resife”yə qarşı oyunu gözlənilən nəticə ilə rəsmiləşdi. Rio de janeyroluların hücumlarına 50 dəqiqə tab gətirən A seriyasının ən zəif iştirakçısının müqavimətini Bruno Enrike qırdı. Linonun ötürməsi ilə hesabı açan 24 yaşlı hücumçu 9 dəqiqə sonra ikinci qolu da vurdu. 67-ci dəqiqədə hesabı darmadağın həddinə çatdıran De Arraskaeta bu mövsüm çempionatda 16-cı dəfə qol sevinci yaşadı. Filipe Luisin komandası inamlı qələbə ilə 2-ci yerdəki mövqeyini möhkəmləndirdi.

Tura 3-cü yerdə başlayan “Kruzeyro” da qızıl medallar uğrunda mübarizədə növbəti addımını atdı. Leonardo Jardimin komandasının “Vitoriya”nı 3:1 hesabıyla məğlub etdiyi oyunda bütün qollar ilk hissədə vuruldu. Dubl edən Kayo Jorje bu mövsüm çempionatdakı qollarının sayını 17-ə çatdırmaqla vahid liderliyi ələ aldı. Xalını 60-a yüksəldən “Kruzeyro” 3-cü yerdə qaldı. Belu orizontelilər bir oyun az keçirən lider “Palmeyras”dan 5 xal geri qalırlar.

Turun maraqla gözlənilən oyunu Mirassolda keçirildi. 4-cü yerdə olan eyniadlı komanda “Botafoqo”ya qarşı mübarizədə topa 66 faiz nəzarət etsə də, hər iki tərəf qapıya yalnız bir dəqiq zərbə endirə bildi. Qapıçılar zərbələri dəf etdilər və matç qolsuz başa çatdı. Mövqeyini möhkəmləndirən “Mirassol” azarkeşlərini Libertadores Kubokunun qrup mərhələsinə birbaşa vəsiqə qazanmaq baxımından bir qədər də ümidləndirdi. Braziliyanın son çempionu olan “Botafoqo” isə 7-ci yerdən 6-ya çıxdı.

Tura 5-ci yerdə başlayan “Bayya”nın “Braqantino” üzərində 2:1 hesablı qələbə ilə mövqeyini qoruduğunu da qeyd edək.

31-ci tur
Juventude - Palmeyras 0:2
Bruno Rodriges, 24. Felipe Anderson, 61.
Flamenqo - Sport Resife 3:0
Bruno Enrike, 51; 60. De Arraskaeta, 67.
Kruzeyro - Vitoriya 3:1
Kayo Jorje, 8-p.; 23. Arroyo, 45 – Oliveyra, 37.
Mirassol - Botafoqo RJ 0:0
Bayya - Braqantino 2:1
Villian Joze, 75; 90+2 – M.Fernandes, 20.
Seara - Fluminense 2:0
Qaleano, 38. Pedro Raul, 72.
Santos - Fortaleza 1:1
Paçeko, 74-öz qapısına – Bareyro, 35.
Korintians - Qremio 2:0
Qustavo Enrike, 46. Depay, 80-p.
İnternasyonal - Atletiko Mineyro 0:0
Vasku da Qama - San Paulu 0:2
Lukas Moura, 45+7-p. Luis Qustavo, 87.

1. Palmeyras 30 20 5 5 55-26 65
2. Flamenqo 30 19 7 4 59-16 64
3. Kruzeyro 31 17 9 5 45-22 60
4. Mirassol 31 15 11 5 52-31 56
5. Bayya 31 15 7 9 42-35 52
6. Botafoqo RJ 31 13 9 9 41-28 48
7. Fluminense 31 14 5 12 37-37 47
8. San Paulu 31 12 8 11 35-33 44
9. Vasku da Qama 31 12 6 13 49-43 42
10. Korintians 31 11 9 11 34-35 42
11. Qremio 31 10 9 12 33-40 39
12. Seara 31 10 8 13 29-29 38
13. Atletiko Mineyro 30 9 10 11 27-32 37
14. Braqantino 31 10 6 15 35-49 36
15. İnternasyonal 31 9 9 13 35-43 36
16. Santos 30 8 9 13 31-43 33
17. Vitoriya 31 7 10 14 28-47 31
18. Fortaleza 30 7 7 16 28-45 28
19. Juventude 31 7 5 19 24-58 26
20. Sport Resife 30 2 11 17 22-49 17

Bombardirlər: Kayo Jorje (Kruzeyro) - 17, De Arraskaeta (Flamenqo) – 16, Veqetti (Vasku da Qama) – 14, Vitor Roke (Palmeyras) - 13, Pedro (Flamenqo) - 12.