A seriyasında 23-cü turun oyunlarında qeydə alınan nəticələrdən sonra liderlər qrupunda vəziyyət olduğu kimi qaldı. Bunun səbəbi ilk “üçlük”də olan komandaların maksimum nəticəyə nail olması ilə bağlıdı. Nəticədə lider ilə əsas izləyicisi arasındakı 3 xallıq fərq dəyişmədi.

Lider “Flamenqo” rəqib meydanında xal itirmədi. Filipe Luisin komandası liqanın ən zəiflərindən sayılan “Juventude”yə hər hissədə bir qol vurdu. Meydan sahibləri liderə yalnız yarım saat müqavimət göstərə bildilər. Rio de janeyrolular isə 32-ci dəqiqədə De Arraskaeta ilə istəklərinə çatdılar. Məşhur ispaniyalı futbolçu Saulun ötürməsi ilə hesabı açan 31 yaşlı uruqvaylı yarımmüdafiəçi cari mövsümdəki qollarının sayını 13-ə çatdırmaqla 2-ci yerdəki mövqeyini qorudu. İkinci hissə liderin üstünlüyü ilə keçsə də, ev sahibləri rəqib hücumlarının qarşısını kəsə bilirdilər. Lakin əsas vaxtın sonuna 3 dəqiqə qalmış Royalın vurduğu qol matçın 0:2 hesablı nəticəsini təmin etdi. Bu nəticə “Flamenqo”nun mövqeyini qorumasına şərait yaratdı. Rio de janeyroluların ehtiyatda bir təxirə salınan oyununun olduğunu da qeyd edək.

Tura 2-ci yerdə başlayan “Kruzeyro” azarkeşlərini yenə qələbə ilə sevindirdi. Belu orizontelilər səfərdə “Bayya”ya çətinliklə qalib gəldilər. Meydan sahibləri 66-cı dəqiqədə hesabı açsalar da, Leonardo Jardimin komandası qalan vaxtda bu qola iki dəfə cavab verdi. Əzmkar qələbə “Kruzeyro”nun 2-ci pillədə qalmasını təmin etdi. “Göylər” yenə lider “Flamenqo”dan 3 xal geri qalırlar.

Əvvəlki turda liderin əsas izləyicisi kimi mövqeyini “Korintians”la derbidən (1:1) sonra əldən verən “Palmeyras” bu dəfə büdrəmədi. Ötən mövsümün vitse-çempionu da hesabına maksimum xal yazdı. Abel Ferreyranın komandası evdə “İnternasyonal”ı 4:1 hesabıyla məğlub etdi. Qaliblər bütün qolları ilk hissədə vurdular. “Barselona”da özünü göstərə bilməyən 20 yaşlı hücumçu Roke het-trik etdi. Ehtiyatda iki təxirə salınan oyunu olan “Palmeyras” liderdən 4 xal geridədi.

“Kruzeyro”ya məğlubiyyət “Bayya”nı 4-cü yerdən 5-ə saldı. “Botafoqo”nun ilk “4-lüy”ə düşmək şansı vardı. Ancaq “San Paulu”ya məğlub olan son çempion 5-ci yerdən 6-ya gerilədi. 4-cü yerə isə “Qremio”ya minimal hesabla qalib gələn “Mirassol” yüksəldi.

23-cü tur
Juventude - Flamenqo 0:2
De Arraskaeta, 32. Royal, 87.
Bayya - Kruzeyro 1:2
Jean Lukas, 66 – Sinisterra, 76. Qabriel Barboza, 86.
Palmeyras - İnternasyonal 4:1
Roke, 4; 24; 43. Evangelista, 29 – Karbonero, 72.
San Paulu - Botafoqo RJ 1:0
Dinenno, 7.
Qremio - Mirassol 0:1
Alesson, 45.
Fortaleza - Vitoriya 2:0
Breno Lopes, 31. Paçeko, 47.
Atletiko Mineyro - Santos 1:1
İqor Qomes, 59 – Tikinyo Soares, 87-p.
Vasku da Qama - Seara 2:2
Koutinyo, 12. Kuesta, 80 – Qaleano, 56. Pedro Enrike, 90+4.
Fluminense - Korintians 0:1
Mateuzinyo, 73.
Braqantino - Sport Resife 1:1
Eduardo Saşa, 57-p. – Laserda, 90+3.

1. Flamenqo 22 15 5 2 47-10 50
2. Kruzeyro 23 14 5 4 37-16 47
3. Palmeyras 21 14 4 3 32-17 46
4. Mirassol 21 10 8 3 36-20 38
5. Bayya 21 10 6 5 29-24 36
6. Botafoqo RJ 21 10 5 6 30-14 35
7. San Paulu 23 9 8 6 27-23 35
8. Braqantino 23 9 4 10 28-33 31
9. Korintians 23 7 8 8 24-28 29
10. Fluminense 21 8 4 9 25-29 28
11. Seara 22 7 6 9 21-22 27
12. İnternasyonal 22 7 6 9 26-33 27
13. Atletiko Mineyro 21 6 7 8 21-25 25
14. Qremio 22 6 7 9 20-27 25
15. Vasku da Qama 22 6 5 11 32-33 23
16. Santos 22 6 5 11 21-32 23
17. Vitoriya 23 4 10 9 19-34 22
18. Juventude 22 6 3 13 19-43 21
19. Fortaleza 22 4 6 12 22-34 18
20. Sport Resife 21 1 8 12 15-34 11

Bombardirlər: Kayo Jorje (Kruzeyro) - 15, De Arraskaeta (Flamenqo) - 13, Veqetti (Vasku da Qama) - 12, Pedro (Flamenqo) - 10, Pedro Raul (Seara), Reynaldo (Mirassol), Renato Kayzer (Vitoriya) - 7.