Braziliya çempionatında keçirilən 6-cı turun oyunlarından sonra turnir cədvəlində lider dəyişdi. Bu vəziyyət “Palmeyras” ilə “Flamenqo”nun fərqli nəticələr göstərməsinə görə qaçılmaz oldu.

Yeni mövsümə evdə son çempion “Botafoqo” ilə qolsuz heç-heçə etməklə başlayan “Palmeyras” ardcıl 4 qələbə ilə vahid liderliyi ələ almışdı. Ötən mövsümün vitse-çempionunun qələbə seriyasını davam etdirmək ehtimalı çox idi. Lakin tura 13-cü yerdə başlayan “Bayya” ilə ev oyununun nəticəsi gözlənilməz oldu. Abel Ferreyranın komandası oyunboyu rəqib qapısına həmlələr etsə də, hesabı heç cür aça bilmədi. Bu, azmış kimi Kayki əsas vaxta əlavə olunan 3-cü dəqiqədə san pauluları şoka salan qol vurdu. Nəticədə qələbə seriyası qırılan “Palmeyras” bu mövsüm ilk məğlubiyyətini alaraq liderliyi itirdi.

Ona görə ki, liderin əsas izləyicisi turu maksimum nəticə ilə başa vurdu. Son mövsümün bürünc mükafatçısı “Flamenqo” evdə “Korintians”ı darmadağın etdi. Filipe Luisin komandası matçın nəticəsini böyük ölçüdə ilk hissədə müəyyən etdi. Everton, De Arraskaeta və Pedronun vurduğu qollar qonaqların aqibətini müəyyənləşdirdi. İkinci hissədə Pedronun penaltini qola çevirməsi rio de janeyrolularun 4:0 hesablı qələbəsini təmin etdi. Maraq üçün yanvarda “Qarabağ”dan ayrılaraq “Flamenqo”ya keçən hücumçu Juninyonun son üç çempionat matçında meydana çıxmaq şansı qazanmadığını da qeyd edək. Onun komandası ardıcıl ikinci böyükhesablı qələbə ilə liderliyi yenidən ələ aldı.

Mövsümün ilk 5 oyununda yalnız 5 xal toplayan “Botafoqo” azarkeşlərini qələbə ilə sevindirdi. Son çempion “Fluminense”nin qapısından iki cavabsız top keçirdi. Rio de Janeyro derbisindəki uğurlu nəticə Renato Payvanın komandasını 15-ci yerdən 8-ə yüksəltdi.

Hesabat turundan sonra “Braqantino” 13 xal toplamaqla “Palmeyras” ilə 2-3-cü yerləri bölüşür. “Kruzeyro” ilə “Fluminense” isə hərəyə 10 xalla 4-5-ci yerləri tuturlar.

6-cı tur
Palmeyras - Bayya 0:1
Kayki, 90+3.

Flamenqo – Korintians 4:0
Everton, 5. De Arraskaeta, 34. Pedro, 37; 78-p.

Botafoqo RJ - Fluminense 2:0
Vitinyo, 37. Savarino, 90+5.

Santos - Braqantino 1:2
David Vaşinqton, 90+4 – Eduardo Saşa, 63. Lakintana, 83.

İnternasyonal - Juventude 3:1
Viktor Qabriel, 18; 39. Borre, 61 – Batalya, 4.

Mirassol - Atletiko Mineyro 2:2
Edson Karioka, 12. Reynaldo, 90+2 – Roni, 70. Halk, 80-p.

Seara - San Paulu 1:1
Pedro Enrike, 4 – Ryan Fransisko, 34.

Sport Resife - Fortaleza 0:0

Kruzeyro - Vasku da Qama 1:0
Kristian, 64.

Vitoriya - Qremio 1:1
Karlinyos, 66 - Jemerson, 20.

1. Flamenqo 6 4 2 0 15-2 14
2. Palmeyras 6 4 1 1 7-3 13
3. Braqantino 6 4 1 1 8-5 13
4. Kruzeyro 6 3 1 2 7-6 10
5. Fluminense 6 3 1 2 6-6 10
6. İnternasyonal 6 2 3 1 8-4 9
7. Bayya 6 2 3 1 6-7 9
8. Botafoqo RJ 6 2 2 2 6-4 8
9. Seara 6 2 2 2 8-7 8
10. San Paulu 6 1 5 0 6-5 8
11. Vasku da Qama 6 2 1 3 6-8 7
12. Korintians 6 2 1 3 6-10 7
13. Juventude 6 2 1 3 7-14 7
14. Mirassol 6 1 4 1 11-9 7
15. Fortaleza 6 1 3 2 5-5 6
16. Vitoriya 6 1 3 2 7-9 6
17. Atletiko Mineyro 6 1 3 2 6-8 6
18. Qremio 6 1 2 2 5-11 5
19. Santos 6 1 1 4 7-9 4
20. Sport Resife 6 0 2 4 3-8 2

Bombardirlər: De Arraskaeta (Flamenqo) - 5, Pedro (Flamenqo), Reynaldo (Mirassol), Pedro Raul (Seara), Veqetti (Vasku da Qama) - 4.