“Qalatasaray” məşhur geyim şirkəti olan “Puma” ilə sponsorluq müqaviləsinin şərtlərinin yeniləndiyini açıqlayıb.

Qeyd edək ki, Türkiyənin 25 qat çempionu bu şirkətlə ötən ildən əməkdaşlıq edir. 2024-cü ilin iyulun 1-dən keçərli olmaqla İstanbul nəhəngi 25 milyon avro qarşılığında “Puma” ilə beşillik, yəni müddəti 2029-a qədər nəzərdə tutulan müqavilə imzalamışdı. “Sarı-qırmızılar” bu anlaşmadan hər mövsüm 5 milyon avro qazanmalıydı. Amma yaxınlarda “Qalatasaray”ın bu şərtlərdən narazı olması və əməkdaşlığı dayandırmaq istəyi barədə iddialar yayılmışdı.

Görünür, “Puma” klubun irəli sürdüyü yeni şərtləri qəbul edib. Belə ki, “Rams Park” stadionunda başqan Dursun Özbək və “Puma” rəsmilərinin də iştirakı ilə tərəflər arasında yeni müqavilə imzalanıb. Budəfəki müqavilə “5+5” illik, yəni 2036-cı ilə qədər nəzərdə tutulub. Yeni anlaşmaya əsasən “Qalatasaray”ın qazancı 25 milyon avrodan 83 milyon avroya yüksəldilib! Bundan başqa, müqavilədə komandanın uğurlarından asılı olan maksimum 14,5 milyon avroluq bonuslar da mövcuddu. Yəni “Cim-Bom” uğurlu nəticələr göstərsə, qazancı 97,5 milyon avroya yüksələ bilər.