Son 2 turda 5 xal itirən və rəqiblərə fərqi azaltmağa imkan verən “Qalatasaray”la bağlı xəbər var.

“Football-plus.az” xəbər verir ki, İstanbul nəhəngi bir futbolçusu ilə yeni müqavilə imzalayıb. Söhbət Barış Alpər Yılmazdan gedir. 22 yaşlı futbolçunun müddəti 2026-cı ildə başa çatmalı olan müqaviləsi birillik yenilənib. Yəni müqavilənin müddəti 2027-yə qədər artırılıb. Sözləşmənin başqa detalları, onun məvacibinin artırılıb-artırılmaması haqda məlumat verilmir. Qeyd edək ki, həm vinger, həm də hücumçu mövqeyində oynamağı bacaran Barış “Qalatasaray”a 2021-in yayında 2,1 milyon avro qarşılığında “Keçiörəngücü”dən transfer olunub. Son dönəmlərdə Türkiyə yığmasına da dəvət alan Barış indiyə qədər “Cim-Bom”da cəmi 14-ü start heyətində olmaqla 48 rəsmi oyuna çıxıb və 3 qol, 1 məhsuldar ötürmə ilə fərqlənib.

Bu arada rəhbərliyin komandanın liderlərindən olan Kərəm Aktürkoğluna da yeni müqavilə təklif etməyə hazırlaşdığı bəlli olub. Bu mövsüm oyunu ilə diqqət çəkməyi bacaran Kərəmlə bağlı tez-tez transfer şayiələri peyda olur. Məsələn, ən son xəbərlərdə “Milan”ın da bu futbolçuya ciddi maraq göstərdiyi deyilir. Hətta “rossonyerlər”in 15 milyon avro ödəməyə hazır olduğunu iddia edən mənbələr də var. “Fanatik”in məlumatına görə, rəhbərlik danışıqlara başlamaq üçün Kərəmin meneceri Ərkut Söğütü İstanbula dəvət edib. 24 yaşlı vingerin hazırki müqaviləsi 2026-ya qədər nəzərdə tutulub və onun illik qazancı 9,5 milyon lirədi. Yeni müqaviləyə əsasən rəhbərlik Kərəmin maaşını 2 dəfə artıraraq 19 milyon lirəyə çatdırmaq istəyir. Aktürkoğlu bu mövsüm 33 rəsmi oyunda 10 qol, 8 məhsuldar ötürməlik performans sərgiləyib.