Türkiyənin son çempionu ''Qalatasaray'' növbəti yeni sponsorun açıqlayıb.

"Football-plus.az" xəbər verir ki, bir neçə gün öncə İstanbul nəhəngi forma sponsorluğu üçün ''Sixt'' şirkəti ilə beşillik müqavilə imzalamışdı. Yəni formanın üzərində bu şirkətin adı qeyd olunmaqda davam edəcək. Bunun qarşılığında ''Aslan'' hər il 7,5 milyon avro qazanacaq.

Bundan başqa tibb sponsorluğu üçün ''Medicana'' şirkəti ilə imzalanan müqaviləyə görə bu il komandanın büdcəsinə 32,5 milyon lirə daxil olacaq. İndi də stadion üçün yeni sponsorun adı bəlli olub. Söhbət Qazaxıstanın ''Rams Global'' şirkətindən gedir. Bu şirkətin Türkiyədə də filialı mövcuddu. Bundan sonra ''Qalatasaray''ın ev oyunlarını keçirdiyi stadion ''Rams Stadionu'' adlanacaq. Xatırladaq ki, ''Əli Sami Yen'' idman kompleksində yerləşən stadion ilk 10 ildə ''Türk Telekom'' adlanırdı. 2021-də ''Qalatasaray'' stadion üçün NEF şirkəti ilə anlaşmışdı. Son iki ildə arena məhz ''Nef Stadionu'' adlanırdı. Bu daşınmaz əmlak şirkəti hazırda ''Qalatasaray''ın başqan vəkili olan Ərdən Timura məxsusdu. Əslində NEF ilə 2021-də beşillik müqavilə imzalanmışdı. ''Cim-Bom'' ilk ildə 40 milyon lirə, hər növbəti ildə 5 milyon artıq qazanırdı. Amma dünən ''sarı-qırmızılar'' NEF-ə təşəkkür edərək müqavilənin ləğv olunduğunu açıqladılar.

Danışmaz əmlak, tibb, turizm, media kimi fərqli sahələrdə fəaliyyət göstərən ''Rams Global'' ilə imzalanan anlaşmanın maddi və digər detalları daha sonra açıqlanacaq.