Superliqada yeni mövsümün açılışını “Trabzonspor” edəcək.

"Football-plus.az" xəbər verir ki, 2023/24-ə cümə günü Trabzonda keçiriləcək “Trabzonspor” – “Antalyaspor” oyunu ilə start veriləcək. Bu arada qaradanizlilərlə bağlı Türkiyə mətbuatında diqqətçəkən xəbər yayılıb. Bilindiyi kimi, “Trabzonspor”un ev oyunlarını keçirdiyi stadion hələ də sponsorsuzdu. Əvəvlki sponsor “Medikal Park” sirkəti ilə olan müqavilənin müddəti hələ ötən yay başa çatmışdı. O vaxtdan bəri sponsor axtarışı davam edirdi. Əvvəlki başqan Ahmet Ağaoğlu bir şirkətlə anlaşmağa yaxın idi. Amma bilindiyi kimi, “Trabzonspor” son çempion statusunda keçirdiyi ötən mövsümdə o qədər bərbad təsir bağışladı ki, əvvəlcə Ağaoğlu, sonra da baş məşqçi Abdulla Avcı istefa verməli oldu. Bu üzdən danışıqlar yarımçıq qaldı. Yeni prezident Ərtuğrul Doğanın apardığı danışıqlar bəhrəsini vermək üzrədi. Şirkətin adı hələ ki açıqlanmır. Amma şayiələrə inansaq, yeni anlaşma klub tarixinin ən böyük sponsorluq anlaşması olacaq. Trabzonda işıq üzü görən nəşrlərin yazdığına görə, bir şirkətlə 5 illik müqavilə imzalanacaq. Önümüzdəki həftə anlaşmanın rəsmən açıqlanacağı gözlənilir. Hələlik şayiələrə əsaslanaraq deyək ki, “Trabzonspor” bu anlaşmadan illik təxminən 9 milyon avro, 5 illik isə təxminən 45-47 milyon avro qazanacaq! Bu xəbər doğrudusa, “Trabzonspor” hətta “Qalatasaray”ın builki anlaşmasını da kölgədə qoyacaq. İstanbul nəhəngi bir müddət öncə stadion sponsorluğu ilə bağlı “Rams Qlobal” şirkəti ilə 5 illik müqavilə imzalamışdı. “Cim-Bom” bu anlaşmadan illik 7,1 milyon avro gəlir əldə edəcək. Artıq stadionun adı da “Rams Park” kimi dəyişdirilib. “Trabzonspor”un stadionuna gəlincə, Türkiyənin Gənclər və İdman Nazirliyinin tabeliyində olan və “Şenol Günəş” idman kompleksinin içində yerləşən 40 minlik arena 2026-nın dekabrında istifadəyə verilib. Stadionun ilk sponsoru o dönəmdəki başqan Muharrem Ustaya məxsus olan “Medikal Park” sağlamlıq şirkəti idi. 2017-də bu şirkətlə 5 illik müqavilə imzalanmışdı. Bu müddətdə “Trabzonspor” 29,5 milyon avro gəlir əldə etmişdi.