“Barselona” Qrizmanna görə qaydanı pozub?
2019-cu ildə Antuan Qrizmannın “Atletiko”dan “Barselona”ya transferi ilə bağlı şübhəli detallar ortaya çıxıb. Bu haqda “El Mundo” məlumat yayıb.
Qəzetin yazdığına görə, Xosep Bartomeunun prezidentliyi dövründə “Barselona”nın transfer ödənişlərini araşdıran hakim Antuan Qrizmannın müqaviləsinin də bu işə daxil edilməsinə qərar verib.
O, klubun “Atletiko”nun icazəsi olmadan futbolçu ilə birbaşa danışıqlara qoyulan qadağanı pozmasından şübhələnir. Bu nəticə gizli danışıqlar zamanı göndərilən elektron məktublara əsaslanır. Qeyd edək ki, qeyd olunan qadağa yalnız oyunçunun müqaviləsinin qüvvədən düşməsinə 6 aydan az vaxt qalanda aradan qalxır.
Hakim qeyd edib ki, Madrid klubu 2019-cu ilin fevral və mart aylarında “Barselona”nın Qrizmannla danışıqlarına görə İspaniya Kral Futbol Federasiyasına (İKFF) müraciət edib. Lakin o vaxt “Barselona”nın belə bir hüququ yox idi. Məhkəmənin yaydığı məlumatda belə bildirilib:
“İstintaq altında olan şəxslərin İKFF-nin mümkün sanksiyalarından qaçmaq üçün “Atletiko” ilə birbaşa danışıqlar apardıqları və proses üçün sübut təqdim edilməməsi əvəzində 15 milyon avro ödənilməsini nəzərdə tutan razılaşma əldə etdikləri iddia edilir”.
Fransalı futbolçu 2019-22-ci ildə müqavilə ilə “Barselona”ya məxsus olub və 2022-ci ildə “Atletiko”ya qayıdıb.
Digər xəbərlər
