“Atletiko”nun Antuan Qrizmannın məsələsini yoluna qoyduğunu xəbər vermişdik. Madrid klubu “Barselona”dan icarəyə götürdüyü futbolçunu birdəfəlik transfer etmişdi.

Football-plus.az xəbər verir ki, klub saytının bazar ertəsi yaydığı məlumatda 31 yaşlı hücumçu ilə müddəti 2026-cı ilin yayınadək nəzərdə tutulan müqavilə imzalandığı bildirilmişdi. Qeyri-rəsmi mənbələr “Atletiko”nun bu keçidə görə 20 milyon avro təzminat ödəyəcəyini iddia etmişdi. Artıq transferin maliyyə detalları da rəsmən açıqlanıb. Kataloniya klubuna futbolçunun keçidinə görə 20 milyon avro əvəzinə 18 milyon avro təzminat ödənilib. “Atletiko” növbəti mövsüm Çempionlar Liqasına vəsiqə qazanarsa, 2 milyon avro bonus ödəyəcək. “Barselona” sabiq oyunçusuna görə daha 4 milyon avro qazana bilər. Madrid klubu Çempionlar Liqasının 1/4 finalına çıxsa, “Barselona”ya daha 2 milyon, turnirin qalibi olsa, yenə 2 milyon avro ödəyəcək. “Atletiko” Qrizmannı 18 milyon avrodan yüksək qiymətə satarsa, bu halda 18 milyon avro ilə 40 milyon avroya qədər satış arasındakı fərq (bu, klublar arasında təzminat kimi yazılıb) “Barselona”nın hesabına köçürüləcək.

Qrizmann “Atletiko”da icarə əsasında 2021-ci ilin yayından oynayır. O, 2014-19-cu illərdə də bu komandanın formasını daşıyıb. Fransalı dünya çempionu 2019-cu ildə 120 milyon avroya “Barselona”ya transfer olunmuşdu. Qrizmann bu mövsüm “Atletiko”nun heyətində 11 matçda meydana çıxıb, 3 qol vurub və 2 məhsuldar ötürmə edib.