Polşada keçirilən "Rajd Nyski" ralli yarışında faciə baş verib.

Turnirin "Stary Las" xüsusi mərhələsində "BMW" markalı avtomobil yoldan çıxaraq ağaca çırpılıb və dərhal alovlanıb. Yerli polis bildirib ki, 40 yaşlı pilot hadisə yerindəcə həlak olub. Hadisə şahidlərinin yardım göstərməsinə baxmayaraq, onun həyatını xilas etmək mümkün olmayıb. Pilot köməkçisi (şturman) isə avtomobildən çıxa bilib və yanıq xəsarətləri ilə xəstəxanaya yerləşdirilib.

Yanğınsöndürmə xidmətinin nümayəndəsinin sözlərinə görə, xilasedicilər hadisə yerinə çatanda avtomobil tam alov içində olub. Təşkilatçıları zərərçəkənlərə və onların ailələrinə hörmət əlaməti kimi yarışın dayandırıldığını açıqlayıb. Qəzada dünyasını dəyişən pilotun iki övladı var.