Marafon yarışlarında hazırkı dünya rekordunun sahibi, keniyalı atlet Kelvin Kiptum avtomobil qəzasında həlak olub. Yol-nəqliyyat hadisəsi Keniyanın Eldoret şəhəri ilə Kaptaqat yaşayış məntəqəsi arasındakı trassda baş verib. Sükan arxasında olan marafonçu idarəetməni itirərək ağaca çırpılıb.

24 yaşlı Kiptumla birgə məşqçisi Jerve Hakizamana da həlak olub. Hər ikisi hadisə yerində dünyasını dəyişib. Onlarla birgə maşında olan qadın isə çoxsaylı zədələrlə yerli hospitalların birinə çatdırılıb.

Kiptum ötən ilin oktyabrında Çikaqo marafonunu 2 saat 35 saniyəyə qət etməklə həmvətəni Eliod Kipçoqenin rekordunu 34 saniyə yaxşılaşdırmışdı. Mərhum idmançı Keniya yığmasının heyətində 26 iyul – 11 avqust aralığında Parisdə keçiriləcək Yay Olimpiya Oyunlarına qatılacaqdı.