Yaxın keçmişin tanınmış türkiyəli qapıçılarından olan Tolqa Zəngin ilə bağlı yeni xəbər var.

''Trabzonspor'' və ''Beşiktaş''ın şərəfini qorumuş, karyerasını bitirdikdən sonra futbol şərhçisi kimi çalışmış 42 yaşlı Zəngin UEFA-nın ən nüfuzlu təhsil proqramlarından birinə qəbul olmağı bacarıb. Söhbət ''UEFA Academy Ecexutive Master for International Players'' proqramından gedir. Bu proqram yalnız futbolun yönəticilik hissəsinə aiddi və iki il davam edir.

Türkiyə mətbuatının yazdığına inansaq, Tolqa Zəngin bu proqrama daxil olmağı bacaran ilk türkiyəli futbol adamıdı. Dünya futbolunun önəmli isimlərindən İvan Rakitiç, Mario Suareslə yanaşı ''Fənərbaxça''da top qovmuş Simon Kyaer və Bruno Alveş kimi isimlər də bu il bura daxil olmağı bacarıb.

Sabiq türkiyəli ünlü hakim Cüneyt Çakır isə Gürcüstan Futbol Federasiyasının rəsmisi kimi proqrama daxil olub. Çakır 2023-ün avqustundan Gürcüstanda Hakimlər Komitəsinin sədri vəzifəsini icra edir. Dərslər UEFA-nın Nyondakı mərkəzində, eləcə də Madrid, Lion və Frankfurtda keçirilir.

Bu proqramda oxuyanlar üçün staj keçmək və təcrübə toplamaq fürsəti də yaradılır.