Türkiyəli futbolçu FİFA-nın yeni layihəsinə dəvət aldı
Türkiyə yığmasının və ''Əl-Əhli''nin üzvü Merih Dəmiral FİFA-nın yeni layihəsində iştirak etməyə dəvət alıb.
''Football-plus.az'' xəbər verir ki, söhbət ''players executive'' proqramından gedir.
Bu proqram daha çox meydandan kənar sahədəki bilikləri artırmağa yardım edir. Bir qədər sadə dildə desək, bu proqramı bitirdikdən sonra idman direktoruğu başda olmaqla futbolda müxtəlif vəzifələrdə çalışmaq daha da asanlaşır. Merih FİFA tərəfindən bu layihədən iştirak etmək üçün bütün dünyadan seçilən 40 oyunçudan biridi. O həm də siyahıda yeganə türkiyəli futbolçudu. İlkin mərhələdə dəvət alanlar üçün bir neçə onlayn toplantı keçiriləcək.
Bundan başqa İsveçrənin Sürix şəhərində iki dəfə canlı bir toplantı keçirilməsi də nəzərdə tutulub. İlk dəfə baş tutacaq proqrama dəvət alanlar arasında Merihdən başqa David Luis, Kazemiro, Rodriqo de Paul, Xavi Martines, Ceymi Vardi kimi tanınmış isimlər də yer alır. ''Fənərbaxça''nın yetirməsi olan və daha öncə ''Alanyaspor'', ''Sassuolo'', ''Yuventus'', ''Atalanta'' kimi klublarda top qovan 27 yaşlı Merih bu layihəyə dəvət alması ilə bağlı Türkiyə Futbol Federasiyasının rəsmi saytına bunları deyib:
''FİFA heyəti ilə keçirdiyim ilk görüşlərdə sınaqlardan uğurla keçərək bu layihəyə qəbul olunduğum üçün çox şadam. Fikrimcə, bu proqrama dəvət alan ən gənc futbolçu mənəm. Futbolçu yaşından asılı olmayaraq karyerasında sonrakı dönəmi də düşünüb planlaşdırmalıdı. Bu proqram sayəsində futbolun yaşıl meydandan kənarda qalan sahəsində özümü inkişaf etdirmək, eləcə də müxtəlif qitələrdən olan həmkarlarımla fikir mübadiləsi aparmaq fürsətim olacaq''.
Digər xəbərlər
