Çempionatda gərginlik artdıqca sarı vərəqələrin də sayı artır.

“Karvan-Yevlax” – “Sabah” oyununda tərəflərdən heç birinin cəzalanmadığını nəzərə alsaq, 5 oyunda 29 sarı, 1 qırmızı vərəqə göstərilməsi heç də səliqəli mübarizədən xəbər vermir. “Zirə” – “Neftçi” oyununun sonunda yaşananlar isə hakim qərarlarının ədalətini də şübhə altına aldı.

Araz-Naxçıvan – İmişli, CAVİD CƏLİLOV
Meydan sahiblərinin qələbəsiylə başa çatan oyun qonaqların da yaxşı oyunuyla yadda qaldı. Bu görüşdə nəticəni “İmişli”nin futbolçularının fərdi səhvləri müəyyənləşdirdi desək, yanılmarıq. O başqa məsələ ki, Cavid Cəlilovun da səhvi oldu. Əminliklə deyə bilərik: ədalət təmsilçisi həmkarlarının yardımı sayəsində işinin öhdəsindən gəldi. Məsələn, onun Bəxtiyarın Ronaldoya qarşı kobud oynadığını zənn edərək təyin etdiyi penalti VAR-ın müdaxiləsiylə ləğv olundu. Yoxsa Cavid bəy gecə başını yastığa rahat qoya bilməyəcəkdi. Futbolçulara göstərilən vərəqə və Slavik Alxasovun əllə oynamasına görə təyin edilən penalti qərarına isə şübhəylə yanaşmaq olmaz. Soruşsaz ki, bəs Jorj Kaşkilya niyə özünə yer tapa bilmirdi? O xırda folların dərhal qeydə alınmasına qarşı çıxırdı. Komandası hesabda geridə olan baş məşqçi, təbii ki, belə davranmalıdı. Ancaq Cavid bəy bu yöndə daha mərhəmətli ola bilərdi...

Sumqayıt – Turan Tovuz, FƏRİD HACIYEV
“Bozqurd”un aşkar üstünlüyü şəraitində keçən matçda hakim qərarları narazılıq doğurmadı. Ümumiyyətlə, Fərid Hacıyev oyun ərzində hansısa qalmaqallı qərarla yadda qalmadı. Bu səbəbdən baş məşqçilərin narazılığını da duymadıq. Elə bizim də Fərid bəyin qərarlarından narazılığımız yoxdu. Hər halda, onun 70-ci dəqiqədə təyin etdiyi penalti qərarı da haqlıydı. Axı Rəhim Sadıxov həqiqətən də cərimə meydançasında Aleksa Yankoviçə qarşı kobud oynamışdı.

Qəbələ - Şamaxı, ELÇİN MƏSİYEV
Autsayderlərin duelini FİFA referisi idarə etdi. “Şamaxı”nın qələbəsi ana südü kimi halaldı. Azı ona görə ki, ədalət təmsilçisinin 5-ci dəqiqədə “Qəbələ”nin qapısına təyin etdiyi penalti qərarı düzgün idi. Niyə? İsaak Amoah əllə oynamışdı. Çoxsaylı vərəqələr də sizi aldatmasın. Çünki hər iki komanda yetərincə kobudluq etdi və Elçin Məsiyev əndazəni aşan futbolçulara münasibətdə rəhmli davranmadı. Belədə “fit sahibi”nin statusuna uyğun idarəçiliklə yadda qaldığını deyə bilərik. Hər halda, hakim qərarları nə Ayxan Abbasov üçün müzakirə mövzusuna çevrildi, nə də Kaxaber Sxadadze üçün.

Zirə - Neftçi, KAMAL UMUDLU
Turun ən biabırçı hakimliyi. Oyun ərzində də bir neçə yanlış qərar oldu, amma bununla bitsəydi, dərdyarı. Matçın sonlarında “Neftçi”nin qapısına penalti təyin etməsi, sadəcə, fiaskodu. Umudlu 90+5-ci dəqiqədə Elvin Bədəlovun cərimə meydançası daxilində Ceyhun Nuriyevə toxunuşu penalti kimi qiymətləndirildi. Niyə, hansı əsasla - bilinmədi. Həmçinin həmin epizodda Alessio Kurçiyə qarşı da qayda pozuntusu var idi. O da gözardı edildi, baxılmadı. Üstəlik Frank De Blekere də Kamal Umudlunun tərəfini tutdu. İlk hissədə sürət elə də yüksək deyildi, 2-ci hissədə isə dinamika artdıqca Kamal bəy də səhvlərə yol verməyə başlayırdı. Yan xətt hakiminin gözünün qabağında top çıxır, Umudluya baxır ki, bayrağı hansı tərəfə qaldırım...

Qarabağ - Kəpəz, NİCAT İSMAYILLI
Oyunun sürəti o qədər də yüksək deyildi. Nicat İsmayıllının idarəçiliyi isə məqbul sayıla bilər. Lakin bir epizod var ki, bu haqda mütləq danışılmalıdı. Maraqlıdı ki, bu epizod mediada da gündəmə çevrilmədi. Söhbət 50-ci dəqiqədə Dani Boltun Luis Paçunun ayağını tapdalamasından gedir. Bu epizod Nicat İsmayıllının gözündən qaçsa da, VAR müdaxilə etdi və referi, sadəcə, sarı vərəqə göstərdi. Sarı vərəqə üçün VAR-a çağırırlar? Paçunun ayağının sınmaması ancaq bəxt üzünə güldüyünə görədi. Baş hakim isə bu epizodu sarı vərəqə ilə dəyərləndirdi. Bir səhv bəlkə də “Kəpəz”i xaldan etdi.

Karvan-Yevlax - Sabah, İNQİLAB MƏMMƏDOV
“Sabah”ın aşkar üstünlüyü şəraitində keçən oyunda hakim qərarları mübahisə doğurmadı. İlk hissədə iki dəfə VAR-a baxıldı. Birincidə Kahim Parrisin qolu ləğv olundu, ikincidə isə “Sabah”ın xeyrinə penalti qərarı verildi. Top Eltun Turabovun açıq əlinə dəymişdi, düzgün qərar verildi. “Sabah”ın oyunboyu böyük üstünlüyə malik olması dinamikanın, şübhəli epizodların azlığına gətirib çıxardı. Matçın sonunda Coy-Lens Mikelslə Kamran İbrahimov arasındakı hava mübarizəsində “davam” işarəsini də doğru saymaq olar. Adi oyun epizodu idi.