Bir turda 27 sarı, 1 qırmızı vərəqə göstərilirsə, səliqəli mübarizədən danışmağa dəyməz.

Özü də həmin vərəqələrin 12-si bir oyuna təsadüf edibsə. Rauf Allahverdiyev “Turan Tovuz” – “Kəpəz” oyununda futbolçulara 11 sarı, 1 qırmızı vərəqə göstərdi. Məhz onun idarəçiliyi günlərdi müzakirə olunur. “Şamaxı” ilə “Zirə”nin turu cəzasız bitirməsi, hakimlərin bütün oyunlarda penalti təyin etməsi də hesabat turunun maraqlı məqamlarındandı.

Araz-Naxçıvan – Zirə, ƏLİYAR AĞAYEV
Avrokuboklar uğrunda mübarizə aparan komandaların Mərdəkanda keçirilən duelində qalib müəyyənləşmədi. Buna həm meydan sahiblərinin, həm də qonaqların tutarlı hücumlardan çəkinməsi, bir qədər istəksiz çıxışı və sürətin azlığı səbəb oldu desək, yanılmarıq. Belədə matçı idarə etmək xeyli asan oldu. Əliyar bəy kobud müdaxilələrə görə qayda pozuntusu qeydə almaqla yanaşı, sərt oyunla diqqəti çəkən Vanderson Meloya və Nuno Rodrigesə “sarı” verdi. Onun cərimə meydançası daxilində Mutsinzinin topa əllə təmasına görə penalti təyin təyin etməsi də haqlı qərar idi. Baxmayaraq ki, Rəşad Sadıqov buna görə hakimi qınadı. Kəsəsi, FİFA referisi səhv qərarla yadda qalmadı.

Sabah – Neftçi, TURAL QURBANOV
Azarkeşlərin dəstəyi, komandaların inamlı oyunu və hesabı açmaq məqsədi ilə irəli atılması paytaxt derbisinə yaraşan ab-hava yaratdı. Masazırda şahidlik etdiyimiz matçda futbol zövqümüzü lazımınca qidalandırmağa mane olan yeganə şəxs isə elə ədalət təmsilçisi oldu. Qurbanov 51-ci dəqiqədə topa əllə toxunan Rafael Quzzonun səhvini görmədi. O, yalnız VAR-ın müdaxiləsiylə penalti təyin etdi. 78-ci dəqiqədə təyin etdiyi növbəti penalti zamanı isə VAR işə qarışdı və qərarını ləğv etməli oldu. Halbuki Yuri Matias cərimə meydançası daxilində Boyan Letiçə qarşı kobudluq etmədi. Sadəcə, “Sabah”ın futbolçusu özünü yerə atmaqla hakimi “tora saldı”. O başqa məsələ ki, gərgin və sərt oyunda göstərilən vərəqələr haqlı idi. Yenə də, görünür, Qurbanov hələ paytaxt derbisini idarə edəcək səviyyəyə yüksəlməyib. Yoxsa təzyiqin altında əzilməzdi!

Turan Tovuz – Kəpəz, RAUF ALLAHVERDİYEV
Turun açılış matçı baxımlı və həyəcanlı keçdi. Allahverdiyev gərgin mübarizənin ağırlığını çəkə bilmədi. O, vərəqələr hesabına oyunun axarına nəzarət etməyə çalışsa da, bunu da bacarmadı. İş o yerə çatdı ki, AFFA Hakimlər Komitəsinin rəhbəri Frenk De Blekere Allahverdiyevin müdafiəsinə qalxdı. Lap tutaq ki, “Kəpəz”in oyunçularına qarşı dəfələrlə qeydə alınan kobudluqlar zamanı penalti təyin etməməsini referinin vicdanına buraxaq. Amma Veysəl Rzayevin hesabı açdığı epizodda topun ələ dəydiyi aşkar görünür. Bu mübahisəli vəziyyətlə bağlı VAR kameralarında aydın görüntünün olmadığının deyilməsi isə fiaskodan başqa bir şey deyil.

Qarabağ – Şamaxı, CAVİD CƏLİLOV
İlk yarısı qolsuz bitən oyuna Cavid Cəlilov damğa vurdu. Sözün pis mənasında! Onun 2-ci hissənin əvvəlində təyin etdiyi penaltini əsaslandırmaq üçün heç bir dəlil yoxdu. Adil Nağıyev Aleksey Kaşukla mübarizədə birmənalı şəkildə qaydalar çərçivəsində oynamışdı ki, bunu De Blekere də təsdiqlədi, daha doğrusu, Cavid Cəlilovun səhv qərar verdiyini etiraf etdi. Belədə hakimin ilk 60 dəqiqədəki başqa qərarlarını sorğulamağa dəyməz. Görünür, bu da taleyin ironiyası idi ki, Cəlilov zədələndiyinə görə 60-cı dəqiqədən sonra onun funksiyalarını Nicat İsmayıllı yerinə yetirməyə başladı. Ya da bəlkə Cavid bəy növbəti səhv qərarlar verəcəyindən çəkinərək yerini həmkarına buraxmağı lazım bildi.

Səbail – Sumqayıt, FƏRİD HACIYEV
Fərid Hacıyev və köməkçiləri “ASCO Arena”da keçirilən qarşılaşmanın öhdəsindən pis gəlmədilər. Amma baş hakimi penalti epizodundakı qətiyyətsizliyinə görə qınamağa dəyər. Rəhim Sadıxov təpiyini işə salıb, Yusif Nəbiyevi yerə sərsə də, Hacıyev penalti təyin etmək fikrində deyildi. Həkimlərin müdaxiləsi zamanı baş hakim əli ilə künc zərbəsinə işarə edirdi. Amma VAR-da oturan Rauf Cabbarovun israrı onu monitora doğru qaçmağa vadar etdi ki, yalnız bundan sonra penalti təyin olundu. Bu epizodu saymasaq, hakimlər briqadasının işini normal qiymətləndirə bilərik.