22 sarı vərəqə göstərildi, meydandan qovulan futbolçu, idarəçiliklə bağlı narazılıq edən baş məşqçi olmadı. Bir sözlə, 15-ci tur yetərincə intizamlı keçdi.

Yalnız iki komanda – “Sumqayıt”la “Kəpəz” 4 və daha artıq sarı vərəqə ilə cəzalandı ki, AFFA İntizam Komitəsi də onları buna görə cəzalandırdı.

Sabah – Səbail, RƏVAN HƏMZƏZADƏ
Paytaxt derbisinin birinci hissəsi gərgin və baxımlı keçsə də, ikinci yarı cansıxıcı oldu. Meydan sahiblərinin üç xala sevindiyi matçda ciddi qayda pozuntuları qeydə alınmadı. Futbolçular intizamlı oyun tərziylə diqqət çəkdi. Həm də bir az istəksiz çıxış edirdilər desək, yanılmarıq. Belədə Həmzəzadənin işi də çətin olmadı. O, yalnız kobud müdaxilələr zamanı varlığını hiss etdirməyə məcbur oldu ki, “Sabah”ın üç futbolçusuna sarı vərəqə göstərdi. Həqiqətən də “bayquşlar”ın futbolçuları hesabı bərabərləşdirməyə çalışan rəqibə qarşı qayda pozuntularına yol verməklə xəbərdarlığı haqq etdilər.

Neftçi – Qarabağ, ƏLİYAR AĞAYEV
Azərbaycan derbisində sürprizə şahidlik etmədik. “Neftçi”nin hələ bu rəqibə layiqincə müqavimət göstərəcək səviyyəyə çatmadığı bəlli oldu. Yəqin ki, bu matçda AFFA nümayəndəsi Elçin Mehtiyev ədalət təmsilçisindən çox işlədi. Ona görə ki, tribunalarda vəziyyət meydandakından gərgin görünürdü. Hər halda, FİFA referisi etiraza səbəb olacaq hansısa qərarla yadda qalmadı. Bakılıların iki, ağdamlıların üç futbolçusu sarı vərəqəylə üzləşdi ki, buna görə hakimi qınamaq olmaz. O, qayda pozuntularına vaxtında müdaxilə etdi, cəzaları yubatmadı. Ağayevə həm də ona görə “sağ ol” deyə bilərik ki, gərgin və emosiyalarına sahib çıxa bilməyən futbolçuların həddini aşmasına imkan vermədi. Qısası, onun təcrübəsi sayəsində Azərbaycan derbisinin ümumi ab-havasına xələl gəlmədi.

Araz-Naxçıvan – Turan Tovuz, CAVİD CƏLİLOV
Oyun yetərinə sürətli və gərgin mübarizə şəraitində keçdi. Amma Cavid Cəlilov bu gərginliyin altında qaldı. Ən bezdirici məqam hakimin tez-tez fit çalması idi. Referi bu yolla tez-tez oyunun axarına müdaxilə edirdi. Tovuzlu azarkeşlər “Araz”ın köpəyi Cavid Cəlilov” deməklə qəzəbini gizlətmədi. Bir sözlə, Cavid bəy oyunla bağlı ümumi təəssürata bir qədər kölgə saldı.

Zirə - Sumqayıt, RƏŞAD ƏHMƏDOV
Rəşad Əhmədov və köməkçiləri məhsuldar oyunun öhdəsindən pis gəlmədi. Gərgin rəqabət şəraitində keçən qarşılaşma “Zirə”nin qələbəsiylə nəticələndi. Hər iki komanda ikinci hissənin əvvələrində mübarizə əzmini ortaya qoysa da, hansısa aqressivliyin şahidi olmadıq. Rəşad bəyin qərarları və mövqe seçimi doğru idi. Komandaların açıq oynamasına şərait yaradan hakim 6 futbolçuya sarı vərəqə göstərdi.

Şamaxı – Kəpəz, İNQİLAB MƏMMƏDOV
Çox da yüksək tempdə keçməyən oyunun 17-ci dəqiqəsində “şirlər”in futbolçusu Belajdi Pusi Yeqor Xvalkonun əllə oynadığını iddia etsə də, hakim oyunu davam etdirdi. 55-ci dəqiqədə - Pusinin əllə oynamasayla bağlı şübhə yarananda da Məmmədov əvvəlcə futbolçuların etirazına məhəl qoymadı. “Sarı-göylər”in təkidindən sonra VAR otağında epizod incələndi. Baş hakim yalnız monitora yaxınlaşıb həmin epizoda təkrar baxandan sonra penalti təyin etdi. Lakin şamaxılı azarkeşlər bu qərarı ədalətsizlik saydı, hətta oyunboyu “Kəpəz”in baş məşqçisinə ünvanlanan “Azər, hakimin qulağına nəsə pıçıldama, keç qırağa” kimi iradlar səsləndirdi. əzən də klub rəsmiləri emosiyalarını saxlaya bilmirdilər. Xülasə, İnqilab Məmmədov “Şamaxı”nın oyunçularına 1, qonaqlara 4 “sarı” göstərdi.