Türkiyə çempionatında istefaların ardı-arası bitmək bilmir. İndi də ''Antalyaspor''dan istefa xəbəri gəlib.

Belə ki, dünən Antalya təmsilçisi Əmrə Belözoğlu ilə yollarını ayırdığını rəsmən açıqladı. Bu, 4 gün ərzində superliqada baş tutan 3-cü məşqçi istefasıdı! Oktyabrın 5-də ''Eyüpspor'' Səlcuk Şahin ilə, 7-də isə ''Kayserispor'' Markus Gisdol ilə yollarını ayırmışdı. ''Antalyaspor'' ötən həftəsonu öz meydanında sürpriz şəkildə ''Çaykur Rizəspor''la oyunda 2:5 hesabı ilə darmadağın olmuş və Belözoğlu matçın ardından istefa verməyə hazır olduğunu bildirmişdi.

Maraqlıdı ki, həmin gün onun istefası qəbul olunmamışdı. Amma göründüyü kimi cəmi bir neçə gündən sonra tərəflər yolları ayırmaq qərarına gəldilər. Daha öncə ''İstanbul BŞ'' və ''Ankaragücü''nü çalışdırmış 45 yaşlı Əmrə Antalya klubunda bu ilin yanvarından çalışırdı. Həmin vaxt o, Aleks de Souzanı əvəzləmişdi. ''Antalyaspor'' bu məşqçinin başçılığı altında keçirdiyi 28 qarşılaşmadan 9 qələbə, 6 heç-heçə, 13 məğlubiyyətlə ayrılmış oldu. Hazırda komanda 8 tura 10 xal toplayaraq 10-cu pillədə qərarlaşıb.

Türkiyə mətbuatının yazdığına inansaq, ''Antalyaspor'' bir neçə həftə öncə ''İstanbul BŞ''dən ayrılan və hazırda işsiz olan Çağdaş Atanla danışıqlar aparsa da, tərəflər anlaşa bilməyib. Bu mövsüm Türkiyə çempionatında məşqçi istefalarının sayının 7-yə çatdığını da bildirək.