Türkiyə çempionatında hər il olduğu kimi bu mövsüm də məşqçi istefalarının bolluğu diqqət çəkir.

''Football-plus.az'' xəbər verir ki, son 11 gündə daha iki məşqçi ilə yollar ayrıldı. ''Trabzonspor'' Şenol Günəş ilə, ''Alanyaspor'' isə Sami Uğurlu ilə vidalaşdı. 2025-ci ildə heç 3-cü ay da tamamlanmayıb. Amma bu təqvim ilində artıq superliqada 8 istefa baş tutub. Günəşlə Uğurludan başqa ''Antalyaspor'' Aleks de Souza ilə, ''Kayserispor'' Sinan Kaloğlu ilə, ''Adana Dəmirspor'' Mustafa Dalcı ilə, ''Kasımpaşa'' Hakan Keleş ilə, ''Bodrum'' Volkan Dəmirəl ilə və ''Sivasspor'' Ömər Ərdoğan ilə vidalaşıb.

Ən heyrət doğuran fakt odu ki, Türkiyə çempionatında bu 2,5 ayda baş tutan istefaların sayı ''böyük beşlik'' ölkələrində bütün mövsüm ərzində baş tutan istefaların sayından daha çoxdu! Məsələn, bu mövsüm indiyə qədər premyer-liqa və Liqa-1-də 6, La Liqada 5, bundesliqada isə 4 istefa reallaşıb. Yalnız A seriyasında mövsümün əvvəlindən bəri olan istefaların sayı (8) Türkiyədə son 2,5 aydakı istefaların sayına bərabərdi.

Superliqada cari ''futbol ili''də 11 klubda ümumilikdə 20 (!) istefa reallaşıb. Yalnız ''Qalatasaray'' (Okan Buruk), ''Fənərbaxça'' (Joze Mourinyo), ''Samsunspor'' (Tomas Rays), ''Eyüpspor'' (Arda Turan), ''Göztəpə'' (Stonimir Stoylov), ''İstanbul BŞ'' (Çağdaş Atan), ''Qaziantep'' (Səlcuk İnan) və ''Çaykur Rizəspor'' (İlhan Palut) mövsümə başladığı məşqçi ilə yoluna davam edir.

ƏLİ